Búgin qazaq ádebietiniń klassigi, kórkem sózdiń sheberi Beiimbet Mailinniń 125 jyldyǵyna arnalǵan is-sharalar Beiimbet Mailin aýdanynyń ortalyǵy Áiet aýylynda keń kólemde atalyp ótti, dep habarlaidy QazAqparat.
«Beiimbet Mailinniń murasy – ulttyń asyl qazynasy» ǵylymi-praktikalyq konferentsiiasynda Qazaqstan Jazýshylar odaǵynyń tóraǵasy Ulyqbek Esdáýlet sóz sóilep, Beiimbet Mailinniń qazaq ádebieti men qoǵamdyq ómirindegi eńbegi týraly sóz etti.
«Beiimbet Mailin – qazaq jazba ádebietiniń basynda turǵan adam. Alyptardyń shoǵyryn bastaýshylardyń biregeii. Sondyqtan da bul sharanyń mańyzy bólek. Bi-aǵań óz dáýirindegi shyndyqty jerine jetkize sýrettedi. Ásirese, halyqtyń basyna týǵan almaǵaiyp kezeń – asharshylyqty barynsha shynshyl beineledi. Qazaq ultynyń taǵdyryna kese-kóldeneń turǵan náýbetter jazýshy nazarynda boldy. Ol aqiqatty búkpesiz aitty. Qazaq prozasyndaǵy áńgime janrynyń negizin salǵan eki adamnyń biri osy Beiimbet Mailin edi. Onyń áńgimeleri ómir shyndyǵyn dóp basty. Shyǵarmalarynyń realistik tegeýrini, kórkemdik biik óresi, taqyrybynyń áralýandyǵymen daralandy. Ózi ómir súrgen qoǵamdy áńgimelerine arqaý etip, entsiklopediialyq kemeldikpen somdai bildi. Mine, biz Bi-aǵańa osy úshin de qaryzdarmyz», - dedi Ulyqbek Esdáýlet.
Sonymen qatar, Jazýshylar odaǵynyń tóraǵasy 80 jyl boiy Taran esimin ielenip kelgen aýdan ortalyǵyna onyń tarihi ataýy qaitarylǵanyn atap ótti.
Konferentsiiada Beiimbet Mailin kezinde jaýapty hatshy bolǵan respýblikalyq «Egemen Qazaqstan» gazetiniń bas redaktory Aibyn Shaǵalaqov pen QR BǴM Memleket tarihy institýtynyń jetekshi ǵylymi qyzmetkeri Qundyzai Erimbetova, taǵy basqa elimizdiń túkpir-túkpirinen kelgen ziialyq qaýym, ádebietshiler men tarihshylar sóz sóilep, Bi-aǵanyń kópshilik bile bermeitin qyrlaryn áńgimeledi.
Shara sońynda biyldyń ózinde aýdannyń áleýmettik-ekonomikalyq damýyna 12 mln teńge baǵyttaǵan «Mailin» JShS direktory, metsenat, biylǵy «Jomart júrek» jobasynyń «Jyl tulǵasy» atanǵan Petr Býshkinge Beiimbet Mailin atyndaǵy Qor arnaiy mereitoilyq tósbelgisin tabystady.
