Búgin qazaq halqy Almatydaǵy M.Áýezov atyndaǵy memlekettik drama teatrynda aiaýly perzenti, birtýar qalamger Sherhan Murtazany aqtyq saparǵa shyǵaryp saldy.
Qaraly jiynǵa jinalǵan qaýym Sherhan Murtazamen birge qyzmet istegen, dos bolyp qatar júrgen kezderden estelikter aitty.
Aqyn, QR Jazýshylar odaǵy basqarmasynyń tóraǵasy Ulyqbek Esdáýlet Sheraǵanyń qazasyn asaý tolqynnyń tynshýymen salystyrdy.
«Sum ajal Alashtyń aiaýly perzenti, abyz aqsaqal, qazaq ádebietiniń qaitalanbas qairatkeri, qazaqtyń uly qalamgeri Sherhan Murtazany ortamyzdan alyp ketti. Qazaq ádebietiniń kórnekti ókili, jazýshy, aqiqattyń aldaspany, shyndyqtyń shyraqshysy atanǵan QR memlekettik syilyǵynyń laýreaty Sherhan Murtaza 87 jasqa qaraǵan shaǵynda dúnieden ótti. Alyp júrek toqtady, asaý tolqyn tynshydy. Qazaqtyń júregi qan jylap, teńselip tur. Sheraǵa óz ǵumyryn tutastai jurtyna arnady. Shyryldaǵan shyndyq úshin janyn shúberekke túiip turyp shaiqasty. Aqiqat úshin arystandai arpalysty. «Aiyr til jylanda ǵana bolady, al adamnyń tili - bireý ǵana» dep týǵan tilimizdiń mártebesi úshin kúresti. Jerdi satý - anany satýmen teń dep, týǵan jeriniń tutastyǵy úshin tartysty. «Rýhy men namysy sóngen el - ólgen el» dep urpaqtyń rýhyn oiatty. «Táýelsizdiktiń dámi tátti, joly qatty» dep egemendigimizdi bekitýge bel býyp kiristi. «Elbasy bireý, qalǵanymyz tireý bolýymyz kerek» dep elimizdiń bolashaǵy úshin kókbairaqtyń astynda tize qosyp birigýimiz kerektigin qadap aitty. Aqiqattyń aldaspany, shyndyqtyń shyraqshysy bolǵan qalamgerdiń ólmes shyǵarmalary urpaqqa miras bolyp qaldy. Kúndei kúrkiregen kúsh-qýaty, muqalmaǵan jigeri, arqyraǵan aibary, naizaǵaidai jarqyldaǵan namysy qaldy», - dedi aqyn.
Ulyqbek Esdáýlet Sherhan Murtazanyń jýrnalistik joly týraly da aityp ótti.
«Sheraǵa elimizdiń baspasózi men aqparat salasyn biikke shyǵarý úshin jan aiamai atsalysty. «Juldyz» jýranlynda, «Leninshil jas» «Qazaq ádebieti», «Egemen Qazaqstan» gazetterinde bas redaktor, QR memlekettik teleradio kompaniiasynyń tóraǵasy bolǵan kezinde de órimdei, talantty jastardy janyna jinap, tálim bere bildi. Ulaǵatty qalamger ǵana emes, uly ustaz atandy. Bul shákirtteriniń bári keiin qazaqtyń birtýar azamattaryna ainalǵanda, ózderin «Sherhannyń shekpeninen shyqqanbyz» dep maqtana alatyn halge jetti», - dedi U.Esdáýlet.
Aita ketý kerek, Qazaqstannyń belgili jazýshysy, qoǵam qairatkeri Sherhan Murtaza 86 jasyna qaraǵan shaǵynda 9-qazanda shamamen 18:30-da Almaty qalasyndaǵy úiinde aýyr naýqastan qaitys bolǵan edi.
