Týra bir jyl buryn Ulybritaniianyń premer-ministri Boris Djonson elde birinshi jalpyulttyq karantin engiziletinin jariialady. Sol kezden beri sharalardy álsiretýdiń artynan lokdaýndar taǵy eki ret engizilgen, dep habarlaidy VVS aqparattyq agenttigi.
Pandemiia kezinde Ulybritaniiada 4,3 mln adam koronavirýsqa shaldyǵyp, 126,4 myń adam qaitys bolǵan. Bul – Eýropadaǵy ólim-jitimniń eń nashar kórsetkishi.
23 naýryzda el koronavirýstan qaitys bolǵan adamdardy bir minýttyq únsizdikpen eske aldy.
Qoǵamdyq pikirdi suraý kezinde lokdaýn bolǵan bir jylda britandyqtar jańa jumys rejimine úirengenderin jáne ony ary qarai jalǵastyra berýdiń mańyzdylyǵy týraly aitqan. Jumys isteýshi turǵyndardyń 30 paiyzǵa jýyǵy úiden jumys isteýdi jalǵastyrǵysy keledi. Britaniia halqynyń úshten bir bóligi qajetti taýarlardy jaqyn mańdaǵy dúkennen satyp alýǵa úirenip qalǵan, al úlken sýpermarketterge tek bólek jaǵdaida ǵana shyǵyp otyrady. Turǵyndardyń 40 paiyzǵa jýyǵy jaiaý júrýge úirenip, qoǵamdyq kólik qyzmetin meilinshe az qoldanatyn bolǵan.
Respondentterdiń qoǵamdaǵy ózgeristerge qatysty pikiri ekige bólindi: olardyń 38 paiyzy pandemiianyń túrli áleýmettik toptardyń arasyndaǵy bólinýshilikti kúsheitkenin aitsa, taǵy 35 paiyzy kerisinshe, britandyqtardyń uiymshyldyǵynyń artqanyna senimdi.
Germaniia biligi eldegi lokdaýndy úsh aptaǵa uzartty, bul Pasha merekesiniń barlyq kezeńin qamtyp otyr. El kantsleri Angela Merkeldiń aitýynsha, bul elde epidemiianyń bastalyp otyrǵan úshinshi kezeńi jaǵdaiynda májbúrli shara bolyp otyr.
Ótken táýlikte Frantsiiada aýrýǵa shaldyǵýdyń 15,7 myń jańa oqiǵasy tirkelgen, 471 patsient qarqyndy terapiia bólimine tústi. Eldiń Densaýlyq saqtaý ministri Frederik Valletýniń aitýynsha, aýrýhanalar qaita tolyp ketken, aldaǵy eki-úsh aptada jańa naýqastar sanynyń aitarlyqtai ósýi kútilýde.
Daniia lokdaýnnan birtindep shyǵýǵa nietti. Dúisenbi kúni keshke el kóshbasshylary iesiniń kovid-málimetteri kórsetiletin arnaiy ótkizý qaǵazyn engizý máselesin kelisti. Daniia biliginiń pikirinshe, bul shara shashtaraz, meiramhanalar, kinoteatrlar men basseinder siiaqty biznesterdi tezirek ashýǵa kómektesedi.
