8 jeltoqsanda Ulybritaniia turǵyndarǵa koronavirýs vaktsinasyn jappai egý baǵdarlamasyn bastady. Birinshi kezekte meditsina qyzmetkerleri men 80 jastan asqan adamdar vaktsinatsiiadan ótedi.
BBC saitynyń jazýynsha, koronavirýs vaktsinasy birinshi Margaret Kinan esimdi 90 jastaǵy áiel adamǵa salynǵan. Osy aptada 91 jasqa tolatyn turǵyn ekpeni "bul - týǵan kúnime jasalǵan eń keremet syilyq" dep ataǵan.
«Meniń aitarym mynaý - ekpe jasatyńyzdar. Vaktsina alyp, ózderińizdi qorǵańyzdar, bul tegin jasalady. Men ekpe aldym, endeshe sizder de jasata alasyzdar. Bul – jaman aýrý. Eger biz epidemiiany toqtatqymyz kelse, COVID-19-ǵa qarsy ekpe alý arqyly saqtyq sharalaryn qabyldaýymyz kerek», - deidi ol.
Eki kún buryn Ulybritaniiaǵa amerikalyq Pfizer jáne germaniialyq BioNTech kompaniiasy birigip ázirlegen koronavirýs vaktsinasynyń alǵashqy partiiasy (800 myń doza) jetkizilgen edi. Ótken aptada Ulybritaniia álemde birinshi bolyp bul vaktsinany tirkegen bolatyn.
BBC saitynyń jazýynsha, osy aidyń sońyna deiin 4 million adamǵa vaktsina egiledi dep josparlanyp otyr.
Ulttyq densaýlyq saqtaý qyzmetiniń bas direktory Saimon Stivens Ulybritaniiada egilgen alǵashqy vaktsinalar "koronavirýspen kúreste sheshýshi ról atqarýy múmkin" dep málimdedi.
Ulybritaniia Pfizer-BioNTech kompaniiasynan 40 mln doza vaktsina alýǵa kelisken. Bul - 20 mln adamǵa eki retten salynady degen sóz. Vaktsinatsiia eldegi 50 shaqty aýrýhanada júrgiziledi. Qarasha aiynda kompaniia vaktsinanyń virýstan 95 paiyz qorǵai alatynyn kórsetti dep málimdegen.
Ulybritaniia - Eýropada virýstan qatty zardap shekken elderdiń biri. Munda 61 myńnan astam adam koronavirýstan qaitys bolǵan. Álem úkimetteri men densaýlyq saqtaý agenttikteri Ulybritaniianyń vaktsinatsiia baǵdarlamasyn muqiiat baqylap otyr.
Koronavirýs juqtyrǵandar sany jaǵynan álemde birinshi orynda turǵan AQSh osy aidyń sońyna taman vaktsinatsiia bastaýdy josparlap otyr.
