Britan parlamenti el úkimetiniń sheteldik memleketterge kómek kólemin jalpy ulttyq kiristiń 0,7%-nan 0,5%-ǵa deiin qysqartý usynysyn qoldady, dep habarlaidy Euronews aqparat agenttigi.
Osy bastamaǵa bailanysty kómekke muqtaj álem elderi biylǵy jyly koroldikten tórt milliard fýnt sterlingke jýyq kólemdegi kómegin almaidy. Zań jobasyn qoldap 333 depýtat daýys berse, taǵy 298 depýtat oǵan qarsy shyqty.
Ulybritaniia Premer-ministri Boris Djonson osyndai qadamnyń qajet bolǵanyn atap ótti.
«Siz óz halqyńyzdy buryn bolmaǵan ekonomikalyq daýyldan qorǵaý úshin 407 milliard fýnt sterling jumsaýǵa májbúrli bolsańyz, memlekettik shyǵynnyń basqa salalaryna da qiyndyq týyndaidy», - dedi ol.
Ulybritaniianyń burynǵy premer-ministri Tereza Mei men oppozitsiia kóshbasshysy Ser Keir Starmen zań jobasyna qatysty qatań syn aitty.
«Damytý maqsatynda jiberilip otyrǵan kómek qysqartylýda. Osy arada biz onyń janjaldardyń aldyn alyp, aýrý jáne úilerin tastap ketetin adamdar sanyn azaitatynyn bilip otyrmyz», - dedi oppozitsiia kóshbasshysy Keir Starmer.
Djonson Qarjy ministrliginiń kómek kólemin burynǵy kórsetkishke qaitarý múmkindigin jyl saiyn qarastyryp otyratynyn málimdedi. Al ázirge birqatar qaiyrymdylyq uiymdar, atap ótkende Oxfam jáne ActionAid kóptegen jobalardy toqtatatynyn eskertti.
