QR Mádeniet jáne sport ministri Arystanbek Muhamediuly Uly Jibek joly elderiniń ortaq týristik vizasyn ázirleýdi usyndy, dep habarlaidy QazAqparat tilshisi.
«Ejelden Qazaqstan Uly Jibek jolynyń ainymas bólshegi boldy jáne 2015 jyly Bodrýmda ótken Túrki keńesine múshe memleket basshylarynyń tórtinshi sammitinde Qazaqstan «Túrki Keńesi: Zamanaýi Jibek joly» týristik ónimin ázirleitin jumys tobynyń úilestirýshisi atandy. Osyǵan bailanysty sózden iske kóship, týrizm boiynsha naqty sheshimderdi Qyrǵyzstanda ótetin túrkitildes memleket basshylarynyń kezekti sammitine usynýymyz kerek», - dedi Arystanbek Muhamediuly Astanada Túrki keńesine múshe memleketteri týrizm jónindegi ministrleriniń tórtinshi kezdesýinde.
Muhamediuly óz sózinde Uly Jibek joly elderiniń vizalyq rejimin ońtailandyrý máselesin kóterdi.
«Uly Jibek joly boiynsha Túrki keńesi bekitken týristik baǵytqa ortaq vizalyq rejim máselesin sheshýimiz qajet. Týristik maqsattaǵy «Uly Jibek joly» vizasy Eýropa elderine ortaq «Shengen» vizasynyń balamasy bolar edi. Osylaisha, sheteldik týristerge ejelgi qalalarymyzdy kórsetip, umytylmas áser syilai alamyz», - dedi ministr.
Ministrdiń aitýynsha, Qazaqstan qazirgi ýaqytta vizalyq-migratsiialyq rejimdi yryqtandyrýǵa kóńil bólip otyr.
«Búginde 61 memlekettiń azamattary qazaqstandyq vizany alýdan bosatyldy. Odan bólek, 48 eldiń azamattaryna týristik viza bererde shaqyrýdy rásimdeý talap etilmeidi. Qytai azamattaryna toptyq týristik vizalar berý qolǵa alyndy. Dál osyndai kelisim Iran memleketimen júrgizilip jatyr. Astana men Almaty áýejailarynda Qytai men Úndistan azamattaryna 72 saǵattyq tranzittik viza beriledi», - dep eske saldy Arystanbek Muhamediuly.
Aita keteiik, 2018 jyldyń 3 qyrkúieginde Qyrǵyzstannyń Sholpan Ata qalasynda túrkitildes Memleketter basshylarynyń kezekti Sammiti ótedi. Sammit 2-8 qyrkúiekte Sholpan atada ótetin Úshinshi Dúniejúzilik kóshpendiler oiyny aiasynda uiymdastyrylmaq.
Túrki yntymaqtastyq keńesi 2009 jyly qurylǵan bolatyn. Onyń quramyna Qazaqstan, Túrkiia, Ázerbaijan men Qyrǵyz Respýblikasy kiredi. Qyrǵyzstanda ótetin kelesi otyrysqa Ózbekstan Respýblikasy da qatysady.
