"Nur Otan" aqyn-jazýshylarǵa qoldaý kórsetýde "Uly dala" baiqaýymen shektelmeidi. Bul týraly Máýlen Áshimbaev búgin «Nur Otan» partiiasy Ortalyq apparatynda ótken respýblikalyq «Uly dala» baiqaýynyń jeńimpazdaryn marapattaý sátinde aityp ótti.
Ótken jyldyń sońynda Elbasymyz «Uly dalanyń jeti qyry» atty maqalasyn jariialap, «Rýhani jańǵyrý» baǵdarlamasyna tyń serpin bergen bolatyn. Soǵan bailanysty elimiz boiynsha aýqymdy jumystar qolǵa alynyp, naqty jobalar júzege asyryla bastady. «Uly dala» shyǵarmashylyq baiqaýy da sondai igi isterdiń biri.
Partiia bul jobany Qazaqstan Jazýshylar odaǵymen birlesip uiymdastyryp otyr. Jalpy baiqaýǵa 18 ben 40 jas aralyǵyndaǵy qalamgerler qatysty. Shyǵarmalardy qabyldaý merziminiń qysqalyǵyna qaramastan 400-den astam eńbek kelip túsken. Nátijesinde bes birdei atalym boiynsha jeńimpazdar men júldegerler anyqtaldy.
Atap aitqanda, «Proza» atalymynda Maqsat Málik úzdik dep tanyldy. Ekinshi Qanat Tileýhanǵa buiyrdy. Al úzdik úshtikti astanalyq Tatiana Kretova túiindedi.
Sol siiaqty «Poeziia» atalymynda Janat Jańqashuly – 1-oryn, Nurgúl Maýlina – 2-oryn, Batyrhan Sársenhan 3-oryn aldy. Úsh aqynnyń da baiqaýǵa óleńder toptamasyn usynǵanyn atap ótken jón.
«Dramatýrgiia, kórkem filmder men teleserialdar stsenarii» atalymynda «Keiki mergen» teleserialynyń stsenariin jazǵan Serjan Zákeruly top jardy. Ekinshi, úshinshi oryndardy tiisinshe Aidos Dildebai jáne Abylai Maýdanov iemdendi.
«Balalarǵa arnalǵan shyǵarmalar» atalymynda «Uly dalanyń jeti qyry» óleńder toptamasynyń avtory Baýyrjan Qaraǵyzuly bas júldeni aldy. Asylan Tilegen ekinshi orynǵa taban tirese, Serikbol Hasan úshinshi orynnan kórindi.
«Pýblitsistika» atalymynda 1-oryn – Maqpal Jumashevaǵa, 2-oryn – Qanat Ábilqaiyrǵa, al 3-oryn Gúlbaný Tebegenovaǵa buiyrdy.
Aita keteiik, baiqaýdyń qazylar alqasynyń quramynda Tólen Ábdik, Aldan Smaiyl, Nesipbek Aituly, Ulyqbek Esdáýlet, Nurtóre Júsip, Júsipbek Qorǵasbek, Kópen Ámirbek jáne Áliia Bópejanova siiaqty belgili qalamgerler boldy.
