QR MSM Til saiasaty komiteti Shaisultan Shaiahmetov atyndaǵy «Til-Qazyna» ulttyq ǵylymi-praktikalyq ortalyǵynyń uiymdastyrýymen biylǵy 8-11 qyrkúiek aralyǵynda qazaqtyń uly aqyny Abaidyń 175 jyldyǵyna orai tuńǵysh ret elimizdiń barlyq óńirlerińde «Uly Abai – halyq júreginde» taqyrybynda respýblikalyq diktant jazý sharasy ótti, dep habarlaidy "Ult aqparat".
Sharanyń maqsaty – uly aqyn Abai muralaryn keńinen nasihattaý jáne jazý mádenietin qalyptastyrýǵa yqpal etý.
«Qazaqtyń uly aqyny Abaidyń 175 jyldyǵy atalyp ótip jatyr. Osyǵan bailanysty elimizde ártúrli sharalar uiymdastyrylýda. Solardyń biri - búgingi jalpyhalyqtyq diktant. Diktantqa bir adamdai qatysyp otyrǵandaryńyz úshin alǵys aitamyn. Bul diktanttyń qandai maqsaty bar? Otan ortaq bolǵannan keiin, til men jer ortaq. Iaǵni, elimizdegi qandai da bolsyn uly tulǵalar da ortaq», - dedi Mádeniet jáne sport ministrligi Til saiasaty komitetiniń tóraǵasy Ádilbek Qaba.
Osy oraida ol memlekettik til men uly tulǵalar ultty biriktiretinin, bárimizdi tutas el etetinin atap ótti.
«Sondyqtan búgin barshyńyzdyń qatysýlaryńyzben memlekettik tilde uly Abaidyń 175 jyldyǵyna arnalǵan «Uly Abai – halyq júreginde» taqyrybynda respýblikalyq diktant jazýdy qolǵa alyp otyrmyz. Abaidyń shyǵarmashylyǵy bárimizge jaqsy tanys. Ol uly adamnyń eńbekteri eshqashan da ultqa bólinbeidi. Uly shyǵarmashylyq barlyq adamzatqa tán, iaǵni Abai tek qazaqtyń ǵana emes, adamzatqa ortaq uly tulǵa», - dedi komitet tóraǵasy.
Bul sharaǵa Til basqarmalary qyzmetkerleri, oblystyq jáne aýdandyq tilderdi oqytý ortalyqtarynyń oqytýshylary, ádiskerler, til mamandary jáne memlekettik qyzmetshiler qatysty. Diktant respýblikamyzdyń ár óńirinde belgilengen kúnderge sáikes ótkizildi. Diktant 145 sózden turady, mátini Abaidyń qara sózderinen qurastyrylǵan.
