Jazǵy demalys maýsymynyń bastalýyna bailanysty Qazaqstan Respýblikasy Prezidentiniń janyndaǵy Áielder isteri jáne otbasylyq-demografiialyq saiasat jónindegi ulttyq komissiia qazaqstandyqtarǵa úndeý jasady, dep habarlaidy ult.kz.
Komissiia jol-kólik oqiǵalary saldarynan balalardyń qaza bolýy men jaraqat alý jaǵdailarynyń jiilep ketkenine alańdaýshylyq bildirip, ata-analardy, júrgizýshilerdi jáne qoǵam ókilderin balalardyń qaýipsizdigine erekshe nazar aýdarýǵa shaqyrdy.
Úndeýde jaz mezgilinde balalardyń kóshede, oiyn alańdarynda, demalys oryndarynda jáne jol boiynda kóbirek ýaqyt ótkizetini atap ótilip, olardyń ómiri men densaýlyǵyn saqtaý eresekterdiń jaýapkershiligine tikelei bailanysty ekeni aitylǵan.
ÚNDEÝ
Qurmetti qazaqstandyqtar!
Qazaqstan Respýblikasy Prezidentiniń janyndaǵy Áielder isteri jáne otbasylyq-demografiialyq saiasat jónindegi ulttyq komissiia jol-kólik oqiǵalary saldarynan balalardyń qaza bolýy men jaraqat alý jaǵdailarynyń jiilep ketýine alańdaýshylyq bildiredi.
Jaz mezgilinde balalar úiden tys jerde kóbirek ýaqyt ótkizedi. Olar kóshede, aýlada, sport jáne oiyn alańdarynda bolady, velosiped, samokat tebedi, demalys oryndaryna barady, saiahattaidy.
Sondyqtan dál osy kezeńde balalardyń qaýipsizdigi eresekterdiń qyraǵylyǵy men jaýapkershiligine tikelei bailanysty.
Osyǵan bailanysty Ulttyq komissiia ata-analardy, júrgizýshilerdi jáne barsha azamattardy aldaǵy jazǵy demalys kezinde balalardyń ómiri men densaýlyǵyna erekshe jaýapkershilikpen qaraýǵa shaqyrady.
Qurmetti ata-analar!
Balalaryńyzben jolda, aýlada, sý aidyndary mańynda jáne tabiǵat aiasynda ózin qaýipsiz ustaý qaǵidalary týraly sóilesińizder. Bul erejelerdi únemi esterine salyp otyryńyzdar.
Balalarǵa jolda asa muqiiat bolý qajettigin túsindirińizder. Joldy tek jaiaý júrginshiler ótkelimen jáne qaýipsizdigine kóz jetkizgennen keiin ǵana kesip ótý qajet. Al ótkelden ótpes buryn mindetti túrde velosipedten nemese samokattan túsý kerek.
Velosiped, samokat nemese rolik tepken kezde balalardyń qorǵanysh quraldaryn paidalanýyn qamtamasyz etińizder.
Úidegi qaýipsizdik máselesine de erekshe nazar aýdaryńyzdar. Terezelerdi qorǵanysh qurylǵylarynsyz ashyq qaldyrmańyzdar, balanyń qulap ketýine ákelýi múmkin jaǵdailarǵa jol bermeńizder, sondai-aq qaýipti zattar men himiialyq zattardyń qaýipsiz oryndarda saqtalýyn qamtamasyz etińizder.
Balalardy qaraýsyz qaldyrmańyzdar, olardyń qai jerde júrgenin baqylaýda ustaǵandaryńyz abzal. Ásirese, keshki ýaqytta balalardyń eresekterdiń qaraýynsyz syrtta júrýine jol bermeńizder.
Osy qarapaiym erejeler balanyń eń qymbat bailyǵy - ómiri men densaýlyǵyn saqtaýǵa kómektesedi.
Qurmetti júrgizýshiler!
Kópshiligińiz – ata-anasyzdar, aǵa-ápkesizder. Kólik tizginine ár otyrǵan saiyn osyny este saqtańyzdar.
Jolda, ásirese turǵyn úilerdiń mańynda, aýlalarda, saiabaqtar men balalar alańdarynyń janynda asa muqiiat bolyńyzdar.
Jyldamdyq rejimin saqtańyzdar, jaiaý júrginshiler ótkeli men aýlaǵa jaqyndaǵanda jyldamdyqty tómendetińizder.
Kólik júrgizý kezinde mobildi qurylǵylardy paidalanýdan bas tartyńyzdar.
Bala kólikti baiqamai qalýy múmkin. Al júrgizýshi balany mindetti túrde baiqaýǵa tiis.
Balalardyń ómiri Sizdiń bir sát nazar aýdarýyńyzǵa bailanysty bolýy múmkin.
Qurmetti qazaqstandyqtar!
Balalardyń ómiri men densaýlyǵy - otbasynyń, qoǵamnyń jáne memlekettiń ortaq jaýapkershiligi.
Eshqandai aldyn alý sharalary eresekterdiń qyraǵylyǵy, jeke ónegesi men balalarǵa degen janashyrlyǵyn almastyra almaidy.
Balalarymyzdyń jazǵy demalysy qaýipsiz ótýi úshin barshamyz birlesip kúsh salaiyq.
QR Prezidentiniń janyndaǵy Áielder isteri jáne otbasylyq-demografiialyq saiasat jónindegi ulttyq komissiia
