2017 jyldyń 7 qyrkúieginde Qazaqstan Respýblikasynyń Ulttyq mýzeiinde Elbasy Nursultan Ábishuly Nazarbaevtyń «Bolashaqqa baǵdar: Rýhani jańǵyrý» atty baǵdarlamalyq maqalasynda kórsetilgen tapsyrmalardyń oryndalýy týraly sóz qozǵalǵan «Ulttyń jańǵyrýy – Máńgilik elge bastar jol» atty dóńgelek ústel ótti.
Is-sharaǵa qoǵam qairatkeri Orazgúl Asanǵazy, L.N. Gýmilev atyndaǵy EUÝ tarih fakýltetiniń dekany, t.ǵ.d., professor Tilegen Sadyqov, Eýraziialyq zertteýler kafedrasynyń meńgerýshisi, t.ǵ.d., professor Nurbek Shaiahmetov, t.ǵ.d., professor Jambyl Artyqbaev, t.ǵ.k., dotsent Erlan Sailaýbai bastaǵan birqatar ǵalymdar men qoǵam qairatkerleri qatysty.
Dóńgelek ústeldiń qatysýshylary Elbasy maqalasynda baiandalǵan ulttyq sanany jańǵyrtý, ulttyq biregeilikti saqtaý, pragmatizm, bilim men báseke, rýhaniiatty qaita túletý, birtindep latyn álipbiine kóshý, «Týǵan jer» baǵdarlamasy syndy alǵa qoiylǵan maqsatty jumystar týrasynda oi qozǵady. Áli de atqarylýy tiis jumystarǵa toqtalyp, basym baǵyt berilýi qajet tapsyrmalardy atap ótti.
L.N. Gýmilev atyndaǵy EUÝ tarih fakýltetiniń dekany, t.ǵ.d., professor Sadyqov Tilegen Sadyquly «Týǵan jer» baǵdarlamasynyń mańyzdylyǵyna toqtaldy. «Qazaqtyń uǵymynda «týǵan jer», «kindik qany tamǵan jer» degen túsinik bar. Bizdiń tarihymyz ben mádenietimiz qazaqtyń keń dalasynda jatyr. Kez kelgen aýdan, aýyldyń tarihyn alyp qarasaq, bizdiń mádenietimiz ónerimiz samsap tur. Biz solardyń barlyǵyn júieleýimiz kerek. Belgili tarihshylar, etnograftar, jergilikti jerdegi belsendi azamattar bar barlyǵymyz birigip osynaý baǵdarlama aiasynda jumys jasaityn bolsaq aitarlyqtai nátije kórsete alamyz» – dei kele, tarihshylar tarapynan atqarylyp jatqan jumystarǵa da toqtaldy. Biyldan bastap tarih mamandyǵyna memlekettik grant sanynyń artyp otyrǵany ult tarihyn, el tarihyn zertteitin tarihshy mamandardyń sanynyń artatynyna yqpal etetinin de tilge tiek etti.
N.Á. Nazarbaevtyń «Bolashaqqa baǵdar: Rýhani jańǵyrý» atty maqalasy 2017 jylǵy 12 sáýirde jaryq kórgen bolatyn. Maqalada Qazaqstan halqynyń rýhani jańǵyrýyna basty nazar aýdarylǵan. Bul baǵytta básekege qabilettilikti arttyryp, bilimniń saltanat qurýyna jaǵdai jasalatyny da maqalada aitylǵan. Álemniń úzdik 100 oqýlyǵyn qazaq tiline aýdarý, álem halqyn otandyq qalamgerlerdiń shyǵarmalarymen tanystyrý boiynsha da jumystar júrgizilýde.
