Elordada ótip jatqan Prezidenttik jastar kadrlyq rezerviniń forýmynda elimizde qolǵa alynyp jatqan Ulttyq jobalardyń basty maqsaty men qyzmeti atalyp kórsetildi, dep habarlaidy QazAqparat.
Atalǵan sharada Strategiialyq josparlaý jáne reformalar agenttiginiń tóraǵasy Qairat Kelimbetov Ulttyq jobalardyń máni men mańyzy týraly aityp berdi.
«Ulttyq joba - Qazaqstandy alǵa damytatyn jańa reforma. Ulttyq jobany engizýde biz Resei, Ulybritaniia, Malaiziia elderiniń tájiribesin zerdeledik. Sebebi atalǵan elder osy jobaǵa kóship, óz ekonomikasyn ilgeriletip otyr. Bizde buǵan deiin memlekettik baǵdarlamalar dep atalyp keldi. Memlekettik baǵdarlamalardyń qalai júzege asyrylyp jatqanyna bárińiz kýásizder. Ulttyq jobanyń ereksheligi bastaǵan reformany aiaǵyna deiin jetkizý jáne ol eldiń árbir azamatyna qatysty. Iaǵni aty aityp turǵandai joba búkil ulttyq qamtidy. Taǵy bir aityp aityp ketetin sát, ulttyq joba ol bir rettik nemese merzimdik shara emes kún saiyn, jyl saiyn jáne ómir boiy júzege asyrylatyn ulttyq damý»,- dedi Q. Kelimbetov.
Onyń aitýynsha, Ulttyq jobany júzege asyrý úshin Úkimet janynan arnaiy jobalyq keńse ashyldy.
«Al biz óz kezegimizde agenttik janynan ulttyq saraptamalyq ortalyq quryp otyrmyz. Maqsat – ulttyq jobanyń qalai júzege asyrylyp jatqanyn saraptaý. Odan bólek, Tsifrlyq damý ministrliginde tsifrlandyrý júiesin qadaǵalaityn ortalyq ashyldy. Ministrlik ulttyq jobalardyń zamanaýi túrde qoljetimdi bolýyna jaýapty. Iaǵni jumysty úshjaqtap atqaratyn bolamyz», - deidi ol.
Sondai-aq, agenttik basshysy Ulttyq jobalardyń basty úsh qyzmetin atap berdi.
«Birinshiden, Ulttyq jobalar keńaýqymdy bolýy tiis. Jáne oǵan respýblikanyń árbir azamaty óz úlesin qosqany jón. Ekinshiden, jobalyq basqarý. Ol degenimiz ýaqyttyń talabyna sai basqarýdyń formasyn ózgertip otyrý jáne adamdardyń da ózgere bilýi. Iaǵni zaman aǵymynan qalyp qoimaýymyz kerek. Úshinshi, ol jasandy intellekt. Qazirgi tańda adamzat ómirinde jasandy intellekt úlken oryn alady», - dedi Q. Kelimbetov.
