2025 jylǵa deiin Qazaqstanda 9 jańa sý qoimasyn salý josparlanýda. Bul týraly QR Ekologiia, geologiia jáne tabiǵi resýrstar ministri Serikqali Brekeshev aityp berdi, dep habarlaidy QazAqparat.
«Sý resýrstaryn basqarýdaǵy basty mindet – qorshaǵan ortanyń, halyqtyń jáne ekonomika salalarynyń qajettilikteri arasynda tepe-teńdik qurý. Bul jaǵdaida halyq pen qorshaǵan ortanyń ómir súrý jaǵdailaryn saqtaý jáne jaqsartý úshin sýdy paidalanýdyń ekologiialyq qaýipsiz jáne ekonomikalyq ońtaily jaǵdailaryn iske asyrý qajet. «Sýdy únemdi paidalaný esebinen ónimdilikti arttyrý» mindeti aiasynda 401 arnany qaita jańartý jáne 212 arnany tsifrlandyrý esebinen sýarý kezinde sý shyǵynyn 4 km3 qysqartý josparlanýda», - dedi ministr Ortalyq kommýnikatsiialar qyzmetinde ótken brifingte.
Sondai-aq, «Jasyl Qazaqstan» ulttyq jobasy aiasynda sýarmaly jerlerdi 600 myń gektarǵa ulǵaitý boiynsha is-sharalar qarastyrylǵan.
«Qosymsha sýarý kózderin qurý úshin 2025 jylǵa deiin Aqmola, Batys Qazaqstan, Jambyl, Qyzylorda jáne Túrkistan oblystarynda jinaqtaý kólemi 1,7 km3 bolatyn 9 jańa sý qoimasyn salý josparlanýda. Biyl Túrkistan oblysynda Keńsai-Qosqorǵan-2 sý qoimasynyń qurylysy aiaqtalyp jatyr, qalǵandary boiynsha TEN nemese JSQ ázirlenýde», - dedi S. Brekeshev.
Ekologiia ministrligi ekojúielerdiń qajettilikterin eskermesten sýdy paidalaný qorshaǵan ortanyń tozýyna ákeletinin eske saldy. Bul rette qolaisyz saldarlardy joiýǵa arnalǵan qarjylyq shyǵyndar olardyń aldyn alý jónindegi sharalarǵa arnalǵan shyǵyndardan joǵary bolyp otyr.
«Osyǵan bailanysty elimizdiń sý obektileriniń ekojúielerin saqtaý mindeti qoiylǵan. Máselen, «Syrdariia ózeniniń arnasyn retteý jáne Aral teńiziniń soltústik bóligin saqtaý» jobasynyń ekinshi kezeńin jáne Býrabai, Shýche, Qopa, Shalqar kólderin qalpyna keltirý jónindegi is-sharalardy iske asyrý josparlanǵan», - dedi ministr.
