Qazaqstanda memlekettik jáne ulttyq joǵary oqý oryndary ótken eki jylda 600-den astam jańa jáne 100-ge jýyq innovatsiialyq bilim baǵdarlamasyn engizdi, dep habarlaidy "Ult aqparat".
Jańa bilim baǵdarlamalaryna joǵary oqý oryndarynda buryn-sońdy kadr daiarlaýǵa paidalanylmaǵan, al innovatsiialyq baǵdarlamalarǵa ýniversitette alǵash ret engizilip otyrǵan jáne basqa JOO-da joq bilim baǵdarlamalary jatady.
Jańa bilim baǵdarlamalarynyń basym bóligi «Pedagogikalyq ǵylymdar» (20%), «Biznes, basqarý jáne quqyq» (18%), «Injenerlik, óńdeý jáne qurylys salalary» (16%) baǵyttary boiynsha ashyldy.
Mundai úrdis pedagogterdiń mártebesin arttyrýmen, sonymen birge el ekonomikasyndaǵy óńdeýshi jáne qurylys salalaryn damytýǵa degen suranyspen bailanysty.
«BǴM-ge vedomstvolyq baǵynyshty ulttyq jáne memlekettik joǵary oqý oryndarynyń barlyq jańa jáne innovatsiialyq baǵdarlamasy joǵary jáne joǵary oqý ornynan keiingi bilim baǵdarlamalarynyń tizilimine engizilgen. Bul olardyń joǵary oqý oryndarynyń bilim berý qyzmetine qoiylatyn biliktilik talaptaryna sáikestigin rastaidy. Qazir biz bilim sapasyna degen suranysty kúsheitip jatyrmyz. Engizilip jatqan baǵdarlamalar jumys berýshilermen birlesip, olardyń mamandarǵa qoiatyn talaptary men suranystaryn eskere otyryp ázirlengen», — dep atap ótti QR BǴM Joǵary jáne joǵary oqý ornynan keiingi bilim departamentiniń direktory Ádilet Toibaev.
Máselen, Qaraǵandy tehnikalyq ýniversitetinde 2019 jyldan bastap 7 jańa bilim baǵdarlamasy boiynsha maman daiarlaý júrgizilip keledi.
Bul - «Mashina jasaý salasyndaǵy tsifrlyq tehnologiialar», «Basqarýdyń kiriktirilgen tsifrlyq júieleri», «Taý-ken kásiporyndary men jerasty qurylystaryn salý», «Tsifrlyq aerofototúsirilim», «Tamaq bioindýstriiasy», «IT-meditsina» jáne «Jerdi qashyqtyqtan aldyn ala tekserý».
Ulttyq jáne memlekettik joǵary oqý oryndary sondai-aq «Kiberpedagogika», «Tsifrlyq analitikalyq bilim berý júielerin jobalaý», «Jasandy intellekt tehnologiialary», «Ushatyn apparattardyń ushý dinamikasy jáne qozǵalysyn basqarý», «Meditsinalyq injiniring» jáne basqa da innovatsiialyq bilim berý baǵdarlamalary boiynsha mamandar daiarlaidy.
Toraiǵyrov ýniversitetinde (burynǵy «S.Toraiǵyrov atyndaǵy Pavlodar memlekettik ýniversiteti») Computer Science innovatsiialyq jańa fakýlteti quryldy.
Ýniversitet stýdentteri kiberqaýipsizdik, baǵdarlamalyq injeneriia, veb-ázirleý, DevOps-injeneriia, grafika jasaýdy úirenedi.
Olarǵa IT salasynyń tájiribeli mamandary sabaq beredi.
Sondai-aq ótken eki jyldyń ishinde joǵary oqý oryndarynda «Tsifrlyq pedagogika», «STEM-bilim berý», «Aqparattyq qaýipsizdik», «Adam resýrstaryn basqarý» jáne basqa da bilim baǵdarlamalary jańartyldy.
Joǵary oqý oryndary basqa da bilim berý baǵdarlamalaryn odan ári jetildirý ári ózektendirý boiynsha jumys júrgizedi.
Búginde qoldanystaǵy baǵdarlamalardyń 40%-dan astamy jańartyldy. Baǵdarlamalarǵa jańa pánder men tájiribege baǵyttalǵan kýrstar engizilgen.
Bilim men ǵylymdy damytýdyń 2020-2025 jyldarǵa arnalǵan memlekettik baǵdarlamasy aiasynda jańa bilim baǵdarlamalaryn engizý jalǵasady.
