Eldegi memlekettik ulttyq tabiǵi parkterdi basqarýdyń modeli ózgerýi múmkin, dep habarlaidy QazAqparat.
Memlekettik ulttyq tabiǵi parkter biznes úshin ekologiialyq qaýipsizdik sheńberinde ashyq bolýy tiis. Kazakh Tourism ulttyq kompaniiasy eldegi 13 parktiń aýmaǵynda týrizmdi osyndai ustanymmen damytpaqshy.
«Kólsaidaǵy basty problema - infraqurylym emes. Basty másele - týriske ne usynamyz degen másele. Týristiń ornalasatyn jeri, jalǵa berý beketteri siiaqty qosalqy dúnieleri kóp. Amerika mysalyn alatyn bolsaq, ol jaqta bári jolǵa qoiylǵan. Ornalastyn jer, quraldar men kólikti jalǵa beretin beketter, aýmaqty aralaityn soqpaqtar men jol silteitin kórneki aqparat naqty jasalǵan. Biz de sondai standarttarǵa talpynýymyz kerek», - deidi kompaniianyń basqarma tóraǵasynyń orynbasary Qairat Sádýaqasov.
Ol úshin Kazakh Tourism ulttyq parkterdiń qoldanystaǵy bas josparlaryn qaita qarap shyqpaq.
«Qoldanystaǵy bas josparlarmen tolyq tanysqannan keiin óz usynysymyzdy beremiz. Ulttyq parkterdi basqarýdyń buǵan deiingi modeli ekologiiaǵa negizdelgen bolatyn. Ulttyq parkterdi jabyq ustaý adamdy tabiǵattan alystatyp jiberýi múmkin. Al halyqaralyq tájiribe ekologiiany saqtai otyryp ta, týrister sanyn arttyrýǵa bolatynyn kórsetip otyr. Jańa model týrister sanyn kóbeitý kezinde ekologiiaǵa ziian kelmeýin qadaǵalaityndei etip daiyndalady. Bul turǵyda bizdiń de sanamyz ózgerýi kerek. Halyq ulttyq park aýmaǵyna demalý úshin kirgende «ol jerde sońyńda qoqys emes, aiaq kiimińniń izi ǵana qalsyn» degen qaǵidatty ustanýy kerek», - dedi ulttyq kompaniia ókili.
Qairat Sádýaqasov bolashaqta investorlar úshin ulttyq parkter aýmaǵynan jer telimderin alý sharasy jeńildeýi múmkin ekenin aitady.
«Biznes parkterge kirgen jaǵdaida qoryq aýmaǵynda qazir qoldanylatyn ekologiialyq talaptardyń bári saqtalatyn bolady. Erekshe kúzetiletin aýmaqtar týraly zań bar óitkeni. Jer ýchaskelerin berý rásimderi jeńildeýi múmkin. Shektelgen sharýashylyq qyzmettiń aiasy keńeitilýi múmkin. Biraq biznes jappai kire almaidy», - dedi ol.
