ەلدەگٸ مەملەكەتتٸك ۇلتتىق تابيعي پاركتەردٸ باسقارۋدىڭ مودەلٸ ٶزگەرۋٸ مٷمكٸن, دەپ حابارلايدى قازاقپارات.
مەملەكەتتٸك ۇلتتىق تابيعي پاركتەر بيزنەس ٷشٸن ەكولوگييالىق قاۋٸپسٸزدٸك شەڭبەرٸندە اشىق بولۋى تيٸس. Kazakh Tourism ۇلتتىق كومپانيياسى ەلدەگٸ 13 پاركتٸڭ اۋماعىندا تۋريزمدٸ وسىنداي ۇستانىممەن دامىتپاقشى.
«كٶلسايداعى باستى پروبلەما - ينفراقۇرىلىم ەمەس. باستى مەسەلە - تۋريسكە نە ۇسىنامىز دەگەن مەسەلە. تۋريستٸڭ ورنالاساتىن جەرٸ, جالعا بەرۋ بەكەتتەرٸ سيياقتى قوسالقى دٷنيەلەرٸ كٶپ. امەريكا مىسالىن الاتىن بولساق, ول جاقتا بەرٸ جولعا قويىلعان. ورنالاستىن جەر, قۇرالدار مەن كٶلٸكتٸ جالعا بەرەتٸن بەكەتتەر, اۋماقتى ارالايتىن سوقپاقتار مەن جول سٸلتەيتٸن كٶرنەكٸ اقپارات ناقتى جاسالعان. بٸز دە سونداي ستاندارتتارعا تالپىنۋىمىز كەرەك», - دەيدٸ كومپانييانىڭ باسقارما تٶراعاسىنىڭ ورىنباسارى قايرات سەدۋاقاسوۆ.
ول ٷشٸن Kazakh Tourism ۇلتتىق پاركتەردٸڭ قولدانىستاعى باس جوسپارلارىن قايتا قاراپ شىقپاق.
«قولدانىستاعى باس جوسپارلارمەن تولىق تانىسقاننان كەيٸن ٶز ۇسىنىسىمىزدى بەرەمٸز. ۇلتتىق پاركتەردٸ باسقارۋدىڭ بۇعان دەيٸنگٸ مودەلٸ ەكولوگيياعا نەگٸزدەلگەن بولاتىن. ۇلتتىق پاركتەردٸ جابىق ۇستاۋ ادامدى تابيعاتتان الىستاتىپ جٸبەرۋٸ مٷمكٸن. ال حالىقارالىق تەجٸريبە ەكولوگييانى ساقتاي وتىرىپ تا, تۋريستەر سانىن ارتتىرۋعا بولاتىنىن كٶرسەتٸپ وتىر. جاڭا مودەل تۋريستەر سانىن كٶبەيتۋ كەزٸندە ەكولوگيياعا زييان كەلمەۋٸن قاداعالايتىندەي ەتٸپ دايىندالادى. بۇل تۇرعىدا بٸزدٸڭ دە سانامىز ٶزگەرۋٸ كەرەك. حالىق ۇلتتىق پارك اۋماعىنا دەمالۋ ٷشٸن كٸرگەندە «ول جەردە سوڭىڭدا قوقىس ەمەس, اياق كيٸمٸڭنٸڭ ٸزٸ عانا قالسىن» دەگەن قاعيداتتى ۇستانۋى كەرەك», - دەدٸ ۇلتتىق كومپانييا ٶكٸلٸ.
قايرات سەدۋاقاسوۆ بولاشاقتا ينۆەستورلار ٷشٸن ۇلتتىق پاركتەر اۋماعىنان جەر تەلٸمدەرٸن الۋ شاراسى جەڭٸلدەۋٸ مٷمكٸن ەكەنٸن ايتادى.
«بيزنەس پاركتەرگە كٸرگەن جاعدايدا قورىق اۋماعىندا قازٸر قولدانىلاتىن ەكولوگييالىق تالاپتاردىڭ بەرٸ ساقتالاتىن بولادى. ەرەكشە كٷزەتٸلەتٸن اۋماقتار تۋرالى زاڭ بار ٶيتكەنٸ. جەر ۋچاسكەلەرٸن بەرۋ رەسٸمدەرٸ جەڭٸلدەۋٸ مٷمكٸن. شەكتەلگەن شارۋاشىلىق قىزمەتتٸڭ اياسى كەڭەيتٸلۋٸ مٷمكٸن. بٸراق بيزنەس جاپپاي كٸرە المايدى», - دەدٸ ول.
