Parlament Májilisinde QR Mádeniet jáne sport ministri Aqtoty Raiymqulova ulttyq sportty damytý jaǵdaiyn baiandady, dep habarlaidy "Ult aqparat".
«Táýelsizdik jyldarynda ulttyq sporttyń 20-dan astam túri belsendi damydy. 2019 jyldyń qorytyndysy boiynsha ulttyq sport túrlerimen 399 myńnan astam adam ainalysty. Búgingi tańda Qazaqstanda ulttyq sport túrleri boiynsha 8 mamandandyrylǵan klýb jáne 13 mamandandyrylǵan sport mektebi bar», - dedi A. Raiymqulova Parlament Májilisindegi Úkimet saǵatynda.
Sonymen qatar ministr «Qazaqstan barysy» jobasy bizdiń ulttyq sportymyzdyń brendine ainalǵanyn, «Eýraziia barysy» men «Álem barysy» týrnirlerin uiymdastyr arqyly halyqaralyq deńgeige shyǵý múmkin bolǵanyn atap ótti.
Taratylǵan málimetke qaraǵanda, 2021 jyly Nur-Sultan qalasynda I Álemdik etnosport oiyndaryn ótkizý bastamasy qarastyrylýda. Bul oiyndarda 15 sport túri boiynsha jarys ótkizý josparlanǵan.
Budan buryn habarlanǵandai, 2019 jyldyń qorytyndysy boiynsha elimizde dene shynyqtyrý jáne sportpen júieli túrde shuǵyldanatyndar sany 5,7 mln adamǵa jetken. Bul jalpy halyqtyń 30,6 paiyzy.
