Qazaqstanda Ulttyq parkterdegi zańbuzýshylyqtar týraly jedel jeli iske qosyldy, dep habarlaidy "Ult aqparat".
Endi kez kelgen azamat ulttyq parktegi jaǵymsyz áreketter, onyń ishinde, aǵashty zańsyz kesý, zańsyz balyq, ań aýlaý, eko-beketterde túbirtek berýden bas tartý, park qyzmetkeriniń jumysyndaǵy olqylyq jáne basqa da zańbuzýshylyqtar týraly foto jáne beine aqparat berý arqyly tikelei habarlai alady.
«Qazirdiń ózinde bizge ulttyq park jumysyna shaǵymdanyp, eskertý aityp jatqandar bar. Árbir qońyraý boiynsha tekseris júrgizilip, kemshilik túzetiledi. Máselen, bir habarlama boiynsha jedel shara qabyldanyp, zańbuzýshylyq joiyldy. Ulttyq parkterdegi jaǵdaidy birge ózgerteiik. Tek birikkende ozyq nátijelerge qol jetkize alamyz!», - dedi QR Ekologiia, geologiia jáne tabiǵi resýrstar ministri Maǵzum Myrzaǵaliev.
QR EGTRM Orman sharýashylyǵy jáne janýarlar dúniesi komiteti jedel jelisiniń nómiri: +7777 6785252.
Jedel jeli vatsabyna joldanǵan habarlamada shaǵym aitýshynyń aty-jóni, sondai-aq, zańbuzýshylyq kórinisiniń sýreti nemese beinetúsirilimi, ulttyq parktiń ataýy jáne ornalasqan jeri shamamen kórsetiledi.
Osylaisha, eldiń árbir turǵyny elimizdiń tabiǵatyn qorǵaýǵa jáne ony saqtaýǵa qatysyp, turǵyndar arasynda joǵary deńgeidegi týristik mádenietti qalyptastyrýǵa yqpal ete alady.
Eske salsaq, budan buryn QR Prezidenti Qasym-Jomart Toqaev azamattardyń tabiǵi demalys oryndaryndaǵy jappai mádenietsizdigi problemasyn kótergen bolatyn. Ótken demalystan bastap, Ekologiia ministrligi QR IIM qyzmetkerlerimen, qoǵam belsendilerimen birlesip, adamdar demalatyn tabiǵi jáne erekshe qorǵalatyn aýmaqtarda reid ótkizile bastady. Zańbuzýshylyq oryn alǵan jaǵdaida túsindirý jumysy júrgizilip, aiyppul salynady. Bul baǵyttaǵy júieli jumys jalǵasyp jatyr.
Budan buryn ministrlik ulttyq parkterde «shashlyk týrizmi» bolmaitynyn atap ótken. Ulttyq parkterge kelýshilerdi ministrlik ekotýrizmdi damytý, onyń ishinde aiaqjoldar men qajetti infraqurylym salý arqyly tartpaq.
Ministrlik qaramaǵyndaǵy memlekettik ulttyq tabiǵi parkter tizimi:
1. Ile-Alataý MUTP
2. «Kólsai kólderi» MUTP
3. Sharyn MUTP
4. «Altyn-Emel» MUTP
5. «Kókshetaý» MUTP
6. Baianaýyl MUTP
7. Qaton-Qaraǵai MUTP
8. Sairam-Ógem MUTP
9. «Buirataý» MUTP
10. Qarqaraly MUTP
11. Jońǵar-Alataýy MUTP
