Uly Abaidyń 175 jyldyǵyna orai, Ulttyq mýzei alańynda aqynnyń beinesi strit-art stilinde salyndy, dep habarlaidy QazAqparat.
20 sharshy metr bolatyn jańa sýretti mýzei qabyrǵasynda Qazaq ulttyq óner ýniversitetiniń stýdentteri, respýblikalyq jáne halyqaralyq baiqaý jeńimpazdary Raiymbek Sákenov pen Aidos Sheker salǵan.
«Uzaq pandemiiadan keiin bizdiń mýzeiimiz qaida jandandy. Sonyń bir kórinisi – búgin ashyq alańdaǵy uiymdastyrylǵan strit-art perfomansyna jinalyp otyrmyz. Ózderińizge belgili, biyl uly aqyn Abaidyń 175 jyldyǵy atalyp ótedi. Onyń qaldyrǵan murasyn nasihattaýda barlyq quraldardy paidalanǵymyz keledi. Sonyń biri – qalalyq óner, iaǵni strit-art.
Sondyqtan, Abaidyń murasyn tek qana kórme alańdarynda emes, mýzeiden tysqary jerde de nasihattaý jastarǵa onyń murasyn oqyp-bilýge qyzyǵýshylyq týdyraryna senimimiz mol. Jalpy strit-art óneri álemde, elimizde bar dúnie. Biraq biz Ulttyq mýzeidiń syrtqy alańyn alǵash ret paidalanyp otyrmyz jáne alǵashqysyn Abaiǵa arnap otyrmyz», - dedi QR Ulttyq mýzeii direktorynyń orynbasary Aibar Qasenalin Ulttyq mýzeide ótken tusaýkeserde.
Óz kezeginde sýretshiler mýraldy salýǵa bir kún jetkilikti ekenin aitty. Olar Abaidyń jan dúniesin, ishki tolǵanystaryn kórsetý úshin qoiý qanyq tústerdi kóbirek qoldanǵan.
«Men Nur-Sultan men Almaty kóshelerindegi 50-den astam nysanda sýret saldym. Strit-art óner túri retinde AQSh-ta paida boldy, sodan keiin Eýropada damydy. Sońǵy kezderi bizdiń elde de, ásirese Nur-SUltan, Almaty, Shymkent syndy iri qalalarda keńinen tarap keledi. Sońǵy 5 jylda túrli mýral-festivalder uiymdastyrylady. Búgingi Abai beinesi Ulttyq mýzei qabyrǵasyna 13,5 sharshy metr aýmaqqa (4,5*3) salynady. Bul – Ulttyq mýzei men sýretshilerdiń ortaq bastamasy. Shamamen 9-10 saǵatta salyp bitiremiz», - dedi sýretshi.
