Qazaqstan halqy Assambleiasynyń kadr rezervi qurylady. Prezident ákimshiligi basshysynyń orynbasary Aida Balaeva Qazaqstan halqy Assambleiasynyń keńesinde atalmysh usynysty qoldady, dep habarlaidy QazAqparat.
«Búginde Memleket basshysy jariialaǵan reformalar paketi kezeń-kezeńimen júzege asyrylyp jatqanyn kórip otyrmyz. Prezident óz Joldaýynda 10-nan astam zań qabyldanǵanyn aitty. Qoǵamdyq keńester, aqparatqa qoljetimdilik týraly zańǵa túzetýler engizildi. Osy máseleler men zańnamalyq túzetýlerdiń bári qoǵam men memleket arasyndaǵy dialogty kúsheitýge yqpal etedi. Meniń oiymsha, osy dialogty ári qarai óristetý kerek. Assambleianyń búkil institýttarynyń osy turǵyda toptasyp jumys istegeni mańyzdy», - dedi Aida Balaeva.
Sondai-aq, ol Qazaqstan halqy assambleiasynyń kadr rezervin qurý týraly usynysty qoldaitynyn jetkizdi.
«Biz QHA kóshbasshylyq mektebin qurýymyz kerek. Ózimizdiń instiýttarymyzdyń missiialaryn oryndai otyryp, ári qarai jumys isteitin jas jáne jigerli azamattardyń pýlyn qalyptastyrýymyz qajet. Bizge Parlament Senatynyń depýtattyǵyna kandidattardy irikteý rásimin ázirleý jóninde usynystar engizý qajet. Zań turǵysynan qalai boltanyn zerdeleýge bolady. Prezident qoǵamdyq keńester men basqa da úkimettik emes uiymdardyń Ulttyq quryltaiǵa kiretinin aitty. Bul jerde QHA keńesteri men institýttarynyń Qazaqstannyń árbir azamatynyń múddesin qorǵai otyryp, Ulttyq quryltai quramynda bolýy da mańyzdy. Sonyń aiasynda jedel túrde úlgilik jospardy ázirleitin jumys toptaryn qurý kerek shyǵar. Ol jospardyń búkil tarmaqtary respýblikalyq aýqymda iske asyrylýy tiis», - dedi Prezident ákimshiligi basshysynyń orynbasary.
