QR Memlekettik keńesshisi Erlan Qarin Ulttyq quryltaidyń ne úshin qurylǵanyn túsindirdi, dep habarlaidy QazAqparat.
«Ulttyq qoǵamdyq senim keńesi jumysyn aiaqtady. Degenmen, onyń negizgi músheleri Ulttyq quryltai quramyna kirdi. Memleket basshysy jańa qurylym jaiynda alǵash ret naýryzdaǵy Joldaýynda málimdegen bolatyn. Ulttyq quryltai ne úshin quryldy? Ulttyq quryltai qoǵamnyń birigýin nyǵaitý jáne keńeitýge ideialar men qadamdar izdeý ári ázirleý úshin dialog platformasyna ainalýdy maqsat tutady», - dep jazdy Memlekettik keńesshi Telegram paraqshasynda.
Sonymen qatar ol Ulttyq quryltaidyń Ulttyq qoǵamdyq keńesten qandai aiyrmashylyǵy bar ekendigin de aitty.
«Eger Ulttyq qoǵamdyq senim keńesindegi pikirtalas taqyryby aǵymdaǵy áleýmettik-ekonomikalyq problemalar, saiasi reformalar máselesi bolsa, al Ulttyq quryltaida talqylaý taqyryby jalpyulttyq qundylyqtar negizinde qoǵam birigýiniń odan ary dami túsýine qatysty uzaqmerzimdi sipattaǵy máseleler bolady», - dedi Erlan Qarin.
Erlan Qarin quryltai quramyna kirgen tanymal birqatar tulǵanyń esimin atady.
«Búgin Memleket basshysy Ulttyq quryltai qurý týraly Jarlyqqa qol qoiyp, onda onyń erejesi men quramy bekitildi. Jańa qoǵamdyq institýttyń músheleri qatarynda mynadai tanymal tulǵalar bar: tanymal kompozitor, jazýshy, Qazaqstannyń Eńbek eri Iliia Jaqanov; Qazaqstannyń halyq jazýshysy, aqyn, qoǵam qairatkeri Muhtar Shahanov; qazaqtyń tuńǵysh ǵaryshkeri, Keńes odaǵynyń batyry, Halyq qaharmany Toqtar Áýbákirov; tanymal jýrnalist ári qoǵam qairatkeri Seidahmet Quttyqadam; kórnekti ǵalym-matematik, akademik Asqar Jumadildaev; iri ekonomist jáne qoǵam qairatkeri Jaqsybek Kúlekeev; tanymal memleket qairatker, saiasatker Álihan Báimenov; jýrnalist, media-menedjer, qoǵam qairatkeri Ermurat Bápi; memleket jáne qoǵam qairatkeri, Parlamenttiń birneshe shaqyrylymynyń depýtaty Nurtai Sabilianov; álem chempiony, Seýl olimpiadasynyń kúmis júldegeri, qoǵam qairatkeri Dáýlet Turlyhanov; ǵalym-biotehnolog, «QazVac» vaktsinasyn ázirleýshi Kúnsulý Zakariia; qoǵam qairatkeri, dintanýshy Qairat Joldybai; tanymal tilshi-ǵalym Anar Fazyljanova; ekolog, azamattyq belsendi Azamat Ámirtaev. Sonymen qatar Qazaqstanǵa tanymal ózge de tulǵalar kirdi. Ulttyq quryltaidyń quramynda jalpy 117 qatysýshy bar», - dep jazdy Memlekettik keńesshi paraqshasynda.
Osy rette Erlan Qarin Ulttyq quryltaidyń basty aiyrmashylyǵy men ereksheligi retinde onyń quramyna árbir óńirlik qoǵamdyq keńesten bir-bir ókil kirgendigin atap ótti.
«Osylaisha, osynaý dialog alańy jergilikti qoǵamdyq keńesterdiń barlyq júiesin ózine tuiyqtaidy. Sonymen qatar Ulttyq quryltaiǵa Parlament depýtattary, saiasi partiialardyń, biznestiń iri salalyq birlestikteriniń, meditsinanyń, bilimniń, ǵylymnyń, mádeniettiń, sporttyń, adam quqyǵyn qorǵaý jáne ózge de áleýmettik toptardyń ókilderi kirdi. Jumysqa jas kóshbasshylar men belsendiler de shaqyrylǵan», - dedi ol.
