Ulttyq qordan beriletin transfertterdi baqylaý kúsheitiledi. Bul týraly Úkimet úiinde ótken brifingte QR Premer-Ministriniń birinshi orynbasary Álihan Smaiylov aitty, dep habarlaidy QazAqparat.
«Memlekettik qarjynyń tiimdiligin arttyrý jáne Ulttyq qordyń aktivterin qalpyna keltirý maqsatynda arnaiy Memlekettik qarjyny basqarý tujyrymdamasy qabyldanady. Ol biýdjet saiasatyn, memlekettik boryshty basqarý, sondai-aq Ulttyq qordyń qarajatyn qalyptastyrý jáne paidalaný máselelerin qamtidy. Memlekettik shyǵystardyń tiimdiligin jáne Ulttyq qordan beriletin transfertterdi baqylaý kúsheitiledi», - dedi birinshi vitse-premer.
Osy rette ol tujyrymdamanyń negizgi tásilderi retinde memlekettik boryshtyń ósýin shekteý jáne ony qaýipsiz deńgeide ustap turý úshin biýdjet tapshylyǵyn kezeń-kezeńimen tómendetý; borysh turaqtylyǵynyń negizgi kórsetkishterin belgileý; barynsha ekonomikalyq tiimdilikke qol jetkizý úshin kelesi sharalardy aiqyndaý usynylǵanyn aitty.
«Biýdjet kiristerin ulǵaitý bóliginde kóleńkeli ekonomikaǵa qarsy is-qimyl jónindegi is-sharalar jospary iske asyrylýda. Josparda biznesti kóleńkeden shyǵýǵa yntalandyrýǵa, salyq jáne keden tólemderin tóleýden jaltarýǵa qarsy kúresti kúsheitýge baǵyttalǵan is-sharalar kózdelgen. Sondai-aq, artyq tosqaýyldardy alyp tastaý jáne zańsyz saýda ainalymyna qarsy is-qimyl boiynsha aýqymdy is-sharalar júrgizilýde», - dedi Álihan Smaiylov.
