Foto: Senat
Senat Tóraǵasy Máýlen Áshimbaevtyń jetekshiligimen Palata otyrysy ótti, dep habarlaidy Ult.kz. Otyrysqa Premer-Ministr Oljas Bektenov, Joǵary aýditorlyq palatanyń tóraǵasy Álihan Smaiylov jáne memlekettik organdar men ulttyq kompaniialardyń ókilderi qatysty.
Otyrysta Senat depýtattary «Qazaqstan Respýblikasynyń Ulttyq qorynan 2025-2027 jyldarǵa arnalǵan kepildendirilgen transfert týraly» zańdy qarastyryp, maquldady. Qujatqa sáikes, atalǵan jyldary respýblikalyq biýdjetke Ulttyq qordan 2 trln teńge kóleminde kepildendirilgen transfert bólinedi. Bul biýdjettiń teńgerimdiligin qamtamasyz etýge jáne Ulttyq qordyń turaqtandyrý qyzmetin iske asyrýǵa múmkindik beredi.
Sonymen qatar, «2025-2027 jyldarǵa arnalǵan respýblikalyq biýdjet týraly» zań talqylandy. Máýlen Áshimbaevtyń aitýynsha, biýdjet shyǵystarynyń birinshi kezektegi baǵyty memlekettik áleýmettik mindettemelerdi tolyq kólemde oryndaý jáne ǵylymdy, bilim berýdi, meditsinany qoldaýdy kúsheitý arqyly adami kapitaldy damytý bolyp qalady.
«Kelesi jyly respýblikalyq biýdjettiń áleýmettik saladaǵy shyǵystary shamamen 40%-dy qurap, 9,7 trillion teńgeden asady. Bul biylǵy jylmen salystyrǵanda 867 mlrd teńgege artyq», – dedi ol.
Senatorlar óńirlerdi damytý men halyqtyń ómir sapasyn arttyrý máselelerine erekshe nazar aýdardy.
«Aýyl turǵyndaryn taza jáne qoljetimdi aýyz sýmen qamtamasyz etýge, elektr jáne gaz jelilerin keńeitýge, joldardy jóndeýge qosymsha qarjy bólinedi. Bul – Memleket basshysynyń tikelei tapsyrmasy», – dep atap ótti Máýlen Áshimbaev.
Senat depýtattary sonymen qatar óńirlerdi damytýǵa qosymsha 60 mlrd teńge bólýdi usyndy. Bul qarajat sýmen jabdyqtaý, «Aýyl – el besigi» baǵdarlamasyn iske asyrý jáne basqa da infraqurylymdyq jobalarǵa baǵyttalmaq.
Otyrys barysynda «Orys tili jónindegi halyqaralyq uiymdy qurý týraly shartty ratifikatsiialaý týraly» zań da qaralyp, maquldandy. Bul qujatty buǵan deiin Ázerbaijan, Belarýs, Resei, Tájikstan, Túrikmenstan jáne Ózbekstan ratifikatsiialaǵan.
