Foto: Kazinform
Qarjy ministrligi men Ulttyq bank «Ulttyq qor – balalarǵa» baǵdarlamasy aiasynda jinaqtalatyn qarajatqa túsinik berdi, dep habarlaidy Ult.kz Kazinform-ǵa silteme jasap.
Búgin Senattyń jalpy otyrysynda depýtat Nurtóre Júsip biyl jyl basynda Qazaqstan azamaty sanalatyn balalarǵa Ulttyq qordan alǵashqy qarajat jinaq qoryna kelip túskenin, bul baǵdarlamaǵa qatysýshylardyń jalpy sany 6 mln 919 myń balany quraǵanyn eske saldy.
- Ulttyq qordan maqsatty transfertter tartý qordyń aktivterine jáne «Ulttyq qor – balalarǵa» baǵdarlamasyn júzege asyrýǵa qalai áser etedi? Biz keleshek urpaqtyń nesibesine qol salyp, qol salǵanda - mol salyp otyrǵan joqpyz ba? 2024 jyldyń sońyna deiin jáne keler jyldary ár balaǵa qandai soma aýdarylady? - dep surady senator.
Óz kezeginde Qarjy ministri Mádi Takiev biyl «Ulttyq qor – balalarǵa» jobasy aiasynda 1 aqpanda 7 mln-ǵa jýyq balaǵa 100 dollar 52 tsentten aýdarylǵanyn aitty.
- Qazir (qordaǵy qarjy) dollarmen esepteledi jáne osy soma qosymsha investitsiialanady. Sondyqtan jinaq ósip jatyr. Investitsiialyq kiriske toqtalsaq, biyl biz 2,6 paiyzben sanadyq. Kelesi jyly 3% investitsiialyq ósim bolady dep boljam jasap otyrmyz. Sondyqtan biz 1 qańtardaǵy sandy eskerip, balalarǵa 118-120 dollar bolatyn shyǵar dep otyrmyz. Biraq ony 1 aqpanǵa deiin taǵy bir naqty esepteý kerek, - dedi Qarjy ministri.
Ulttyq bank tóraǵasy Timýr Súleimenovtiń sózine qaraǵanda, «Ulttyq qor – balalarǵa» jobasy boiynsha balalarǵa tiesili soma 890 mln dollarǵa jetken.
- Aldyn ala esep boiynsha jan basyna shaqqanda ár balaǵa – 130 dollar. Mádi Tákiev (Qarjy ministri) aitqandai, 1 qańtarǵa deiin dúniege kelgen balalar sanyn, olardyń qai bóligi 18 jasqa tolǵanyn eseptep, tiisti aqparatty jariialaimyz. Jalpy balalarǵa arnalǵan osy qarajat infliatsiiadan qorǵalǵan, sebebi dollarmen saqtalady, - dedi UB basshysy.
