Ulttyq qordyń aktivteri jyl basynan beri 3,4 mlrd dollarǵa tómendedi. Bul týraly Úkimettiń keńeitilgen otyrysynda Ulttyq bank tóraǵasy Ǵalymjan Pirmatov aitty, dep habarlaidy QazAqparat.
«Ulttyq banktiń altyn-valiýta rezervteri valiýtalyq interventsiialar, ekinshi deńgeidegi bankter shottaryndaǵy qaldyqtardyń qysqarýy jáne syrtqy borysh boiynsha tólemder saldarynan jyl basynan beri 2,4 mlrd dollarǵa tómendep, 32 mlrd dollar boldy. Ulttyq qordyń aktivteri jyl basynan beri 3,4 mlrd dollarǵa tómendep maýsymnyń sońynda 51,9 mlrd dollardy qurady. Respýblikalyq biýdjetke biylǵy 6 aida 2,4 trln teńge somasyna transfertter bólý úshin 2,7 mlrd dollarǵa valiýtalyq aktivter satyldy», - dedi Ulttyq bank tóraǵasy.
Ǵalymjan Pirmatovtyń atap ótýinshe, munai baǵasynyń aitarlyqtai ósýi aiasynda jyl basynan beri túsimder 3,1 trln teńgeni qurady. Bul ótken jyldyń sáikes kezeńimen salystyrǵanda 3 eseden astamǵa artqanyn kórsetedi.
«Ulttyq qordyń kiristiligi qurylǵannan bastap 30 maýsym aralyǵynda jyldyq mánde 3,05 paiyz boldy. Jalpy halyqaralyq rezervter maýsymnyń sońynda 83,9 mlrd dollardy qurady. Ulttyq bank teńgerimsizdikterdiń jinaqtalýyn boldyrmaý jáne altyn-valiýta rezervteriniń saqtalýyn qamtamasyz etý úshin ikemdi baǵam belgileý rejimin ustanýdy jalǵastyrady», - dedi ol.
