Qazaq tili álipbiin latyn grafikasyna kóshirý jónindegi ulttyq komissiia janyndaǵy Orfografiialyq jumys tobynyń kezekti otyrysy ótti. Bul týraly Sh. Shaiahmetov atyndaǵy «Til-Qazyna» ulttyq ǵylymi-praktikalyq ortalyǵynan habarlady.
Málim etilgendei, 20 tamyz kúni QR Mádeniet jáne sport ministrligi Til saiasaty komitetiniń uiymdastyrýymen «Qazaq tili álipbiin latyn grafikasyna 2025 jylǵa deiingi kezeń-kezeńimen kóshirý jónindegi is-sharalar jospary» aiasynda Qazaq tili álipbiin latyn grafikasyna kóshirý jónindegi ulttyq komissiia janyndaǵy Orfografiialyq jumys tobynyń kezekti otyrysy ótti.
QR Mádeniet jáne sport vitse-ministri, Orfografiialyq jumys tobynyń tóraǵasy N.Dáýeshov jańa álipbidi engizý jáne soǵan sáikes emle erejelerin jasaý máseleleri tóńireginde aitty.
«A.Baitursynuly atyndaǵy Til bilimi institýtynyń direktory, filologiia ǵylymdarynyń kandidaty A.Fazyljanova jańa álipbi negizindegi qazaq tiliniń emle erejeleri jobasyna orfografiialyq top músheleri men táýelsiz sarapshylardyń qorytyndy saraptamasy boiynsha baiandama jasady. Baiandamashy jumys toby músheleri men táýelsiz sarapshylar tarapynan aitylǵan syn-pikirlerge ǵylymi dáiekti jaýap berip, olardyń oryndy usynystarynyń eskerilgen tustary týraly baiandady. Emle erejeleriniń meiilinshe ekshelip, ǵalymdar súzgisinen san márte ótkizilip otyrǵanynyń máni – onyń halyq tutynýyna yńǵaily da jatyq bolýyna yqpal etý ekenin aitty.
Orfografiialyq jumys toby músheleriniń jáne táýelsiz sarapshylardyń emle erejeleri boiynsha bergen usynystary, pikirleri keń túrde talqylandy», - dep málim etti Sh. Shaiahmetov atyndaǵy «Til-Qazyna» ulttyq ǵylymi-praktikalyq ortalyǵynan.
Otyrys qorytyndysynda aitylǵan usynystar men pikirlerdi eskerý jáne latynnegizdi álipbi boiynsha pernetaqta jobasyn áli de pysyqtaý qajettigi sheshildi.
Onlain-sharaǵa Orfografiialyq jumys toby músheleri, QR Bilim jáne ǵylym ministrligi Ǵylym komiteti tóraǵasynyń orynbasarlary Bolat Keńesov pen Azamat Rysjanov jáne táýelsiz sarapshylar qatysty.
