Ulttyq qoǵamdyq senim keńesiniń qurylýy elimizde azamattyq qoǵamdy damytý jolynda jasalǵan naqty qadam. Bul týraly Demokratiialyq kúshterdiń «Qazaqstan-2050» jalpyulttyq koalitsiiasynyń otyrysynda «Nur Otan» partiiasy Tóraǵasynyń birinshi orynbasary Máýlen Áshimbaev málim etti, dep habarlaidy QazAqparat tilshisi.
«9 maýsymda ótken prezidenttik sailaýda qazaqstandyqtardyń basym bóligi óz daýystaryn Qasym-Jomart Toqaevqa berip, Elbasymyzdyń strategiialyq saiasatynyń sabaqtastyǵy men elimizdiń turaqty damýyn tańdady. 12 maýsymda Qasym-Jomart Kemeluly Qazaqstan halqyna ant berip, resmi túrde qyzmetine kiristi. Sonyń nátijesinde, Qazaqstanda joǵary biliktiń aýysýy elimizdiń barlyq zańyna sáikes júrgizildi, bul Qazaqstannyń ishki turaqtylyǵyn qamtamasyz etetin negizgi faktor dep qabyldaimyz. Keshe Memleket basshysy ulyqtaý rásiminde bilik pen qoǵamnyń aldynda turǵan eń negizgi maqsattarǵa toqtalyp ótti. Olardyń júzege asyrylýy halyqtyń ál-aýqatyn ári qarai arttyryp, ekonomikalyq jáne saiasi júiemizdiń damýyna tyń serpin beretini sózsiz. Sonymen qatar, Qasym-Jomart Toqaev bilik pen azamattyq qoǵamnyń arasyndaǵy dialogty ári qarai damytý kerektigine de erekshe nazar aýdardy», - dedi M. Áshimbaev.
Bul turǵyda «Nur Otan» partiiasy Tóraǵasynyń birinshi orynbasary jańadan qurylǵan Ulttyq qoǵamdyq senim keńesine qatysty pikir bildirdi.
«Prezident Jarlyǵymen Ulttyq qoǵamdyq senim keńesi quryldy. Bul elimizde azamattyq qoǵamdy damytý jolynda jasalǵan naqty qadam. Memleket basshysy atap ótkendei, birtutas el bolyp qalý - bizdiń basty baǵdarymyz. Judyryqtai jumylyp, qoǵamnyń barlyq ókilderin, sonyń ishinde jastardy da dialogqa shaqyryp, birigip áreket etsek qana kózdegen maqsattarymyzǵa qol jetkizetinimiz anyq. Ulttyq qoǵamdyq senim keńesi azamattyq qoǵamnyń damýyna tyń berip qana qoimai, jańǵyrý men reformalardyń tyń ózegine de ainalady dep oilaimyz. Milliondaǵan qazaqstandyqtardyń pikir men kózqarasyn bildiretin demokratiialyq kúshterdiń jalpyulttyq koalitsiiasy osyndai mańyzdy kezeńde Elbasy saiasatynyń sabaqtastyǵyn qamtamasyz etip, Prezidentimizdiń elimizdiń aldyna qoiyp otyrǵan maqsattaryna jetýimizge óziniń laiyqty úlesin qosady dep senemiz», - dedi Máýlen Áshimbaev koalitsiia otyrysynda.
Atap aitqanda, búgingi otyrys barysynda Demokratiialyq kúshterdiń «Qazaqstan-2050» jalpyulttyq koalitsiiasy prezidenttik sailaýdyń nátijelerin qoldady.
