Foto: QR MAM
Qazaqstan Respýblikasynyń Ulttyq kitaphanasynda uly aqyn, oishyl, qazaq ádebietiniń klassigi Abai Qunanbaiulynyń 180 jyldyǵyna arnalǵan «Adamzattyń Abaiy» atty mádeni is-shara ótti, dep habarlaidy Ult.kz.
Shara aiasynda aqynnyń sirek kezdesetin basylymdary men mýzykalyq muralaryn qamtyǵan kórme uiymdastyryldy. Ekspozitsiiada 30-dan asa sirek kitaptar men qoljazbalar qoiylǵan, onyń ishinde 10-nan astam túpnusqa eńbek bar.
Kórmeniń eń qundy jádigerleriniń biri – 1909 jyly Sankt-Peterbýrgte Ilias Boraganskii baspasynan jaryq kórgen Abai shyǵarmalarynyń alǵashqy jinaǵy. Jinaqty aqynnyń nemere inisi Kákitai Ysqaquly men uly Turaǵul qurastyryp, baspaǵa daiyndaǵan. Arab qarpimen terilgen bul basylym myń danamen shyqqan, búginde onyń tórteýi ǵana saqtalǵan, sonyń biri – Ulttyq kitaphana qorynda.
Sonymen qatar, «Ǵylym ordasy» RMK Ortalyq ǵylymi kitaphanasynyń qorynan Abaidyń erte shyqqan basylymdary, kórkem shyǵarmalary men mýzykalyq muralary usynyldy. Arasynda 1905 jyly arab áripimen jazylǵan Abaidyń óz qoljazbasy jáne ádebi hatshysy Múrseiit Bikeulynyń «Abaidyń shyǵarmalary» atty qoljazbasy bar.
Merekelik baǵdarlamada «Abai álem tilderinde» ádebi-sazdy keshi, «Adamzattyń bárin súi, baýyrym dep» jyr keshi, «Abai 14» kitap klýbynyń ashylýy, «Abaidyń sońǵy kúnderi» derekti filmi, jas abaitanýshylarmen kezdesý jáne «Abai bol LIKE» intellektýaldy viktorinasy ótti.
