Ulttyq kinony qoldaý memlekettik ortalyǵynyń saraptamasyna kelip túsetin filmderdi irikteitin keńeske Smaǵul Elýbaev, Jabal Erǵaliev, Tuńǵyshbai Jamanqulov, Doshan Joljaqsynov, Talǵat Temenov, Satybaldy Narymbetov, Rústem Ábdirashev siiaqty saqa mamandar kirdi, dep habarlaidy QazAqparat.
Memlekettik biýdjet esebinen túsiriletin filmder Ulttyq kinony qoldaý memlekettik ortalyǵy arqyly irikteledi. Pitchingke kelip túsken jobalardy irikteitin saraptama keńesiniń quramy negizinen orystildiler degen syn kóp aitylyp júr. Iaǵni, filmderdi irikteýshilerdiń basym kópshiligi orystildi bolǵandyqtan, qazaq tildi jobalar irikteýden ótpei qalady degen ýájder bar.
Vitse-ministr Nurǵisa Dáýeshovtiń bergen jaýabynda saraptalamyq keńestiń quramy qaita ózektendirilgeni aitylypty.
«Ulttyq kinony qoldaý memlekettik ortalyǵyn qurý týraly» Qazaqstan Respýblikasy Úkimetiniń 2019 jylǵy 15 naýryzdaǵy № 113 qaýlysyna sáikes, filmdi ulttyq dep taný jónindegi usynystardy tujyrymdaý maqsatynda Ulttyq kinony qoldaý memlekettik ortalyǵynyń janynan Saraptama keńesi qurylǵan. Búgingi kúni Ministrlik tarapynan Saraptama keńesiniń quramyn ózektendirý maqsatynda «Ulttyq kinony qoldaý memlekettik ortalyǵyn qurý týraly» Úkimet qaýlysyna ózgeris engizý týraly» jańa qaýly jobasyn engizdi. Atalǵan quramda Smaǵul Elýbaev, Jabal Erǵaliev, Tuńǵyshbai Jamanqulov, Doshan Joljaqsynov, Talǵat Temenov, Satybaldy Narymbetov, Rústem Ábdirashev jáne taǵy da basqa belgili kásibi mamandar bar ekenin atap ótemiz», - delingen jaýapta.
