Qazaqstan Prezdidenti janynan qurylǵan Ulttyq qoǵamdyq senim keńesinde jer máselesi qaralady. Bul týraly Úkimet otyrysynda premer-ministrdiń orynbasary Jeńis Qasymbek habarlady, dep jazady Sputnik Qazaqstan.
"Kelesi másele – aýyl sharýashylyǵy jerlerin satý jáne jalǵa berý moratoriii. Aýyl sharýashylyǵy ministrliginiń alańynda zań jobasynyń tujyrymdamasy tanystyryldy. Osy máselelerdi jurtshylyqpen talqylaý úshin óńirlerdi aralaý kestesi bekitildi. 2019 jyldyń sońyna qarai bul másele Qazaqstan Respýblikasy Prezidentiniń janyndaǵy Ulttyq qoǵamdyq senim keńesine usynylatyn bolady", - dedi Qasymbek Úkimet otyrysynda.
Onyń aitýynsha, jerdi satý máselesi qaralmaidy.
"Jer sheteldikterge, jalpy, eshkimge satylmaidy. Qazir ainalymǵa kirmei jatqan jerler bar ǵoi. Tiimdi paidalanylyp jatqan joq. Sol jerlerdi qazaqstandyqtarǵa jalǵa berý máselesi qaralady", - dedi Qasymbek jýrnalisterge bergen suqbatynda.
Premer-ministrdiń orynbasary bul másele qoǵammen talqylanatynyn aitty.
"Men dál qazir naqty eshteńe aita almaimyn. Kúzde qoǵamnyń qatysýymen óńirlerde barlyq máseleler keńinen talqylanady. Sóitip, jyldyń sońynda ǵana keńestiń talqysyna shyǵarylady", - dedi Qasymbek.
Aita ketsek, memleket basshysy Qasym-Jomart Toqaev 17 shildede prezident janyndaǵy Ulttyq qoǵamdyq senim keńesi erejesi men quramyn bekitý týraly jarlyqqa qol qoidy.
Ulttyq keńestiń negizgi maqsaty – jurtshylyqtyń, saiasi partiialardyń, azamattyq qoǵamnyń ókilderimen keńinen talqylaý negizinde memlekettik saiasattyń ózekti máseleleri boiynsha usynystar men usynymdar tujyrymdaý.
