«Almaty Management University» prezidenti, qoǵam qairatkeri Asylbek Qojahmetov memlekettik organdar halyqqa qyzmet etýi kerek degen qaǵida oryndalmai kele jatqanyn másele etip kóterdi, dep habarlaidy "Ult aqparat".
«Elimizde memlekettik organdar keńselerine azamattardyń qol jetimdiligi narazylyq týdyrady. «Halyqtyń memlekettik keńselerge emes, memlekettik keńselerdiń halyqqa qyzmet etýi kerek» degen qaǵida oryndalmai keledi. Memlekettik organdardyń azamattarǵa aiqara ashylǵan esigin kórý múmkin emes. Sondyqtan, sátti tájiribelerdi qoldanyp, ár memorganda kezdesýler men kópshilik is-sharalardy ótkizý úshin Úkimettik emes uiymdar ókilderine ruqsat qujattarynsyz, shekteý jasalmai, uialy telefondarymen kire alatyn ár mekemeniń birinshi qabatynda arnaiy kópfýnktsionaldy keńistik qurý jóninde usynys jasaimyn», - dedi Asylbek Qojahmetov elordadaǵy Ulttyq qoǵamdyq senim keńesiniń alǵashqy otyrysynda.
Sondai-aq, ol belsendi azamattardy ulttyq kompaniialardyń direktorlar keńesine engizýdi usyndy
«Prezident Qasym-Jomart Toqaevtyń kvazimemlekettik sektordy qysqartý týraly usynysyn qoldaimyz. Qazaqstannyń búkil ekonomikasynyń 60 paiyzdan astamyn quraityn atalmysh sektor jumysynyń ashyqtyǵy men eseptiligin arttyrý maqsatynda bir bilikti azamattyq belsendini ár ulttyq kompaniialardyń – «Samuryq-Qazyna», «Báiterek», «Kazagro» jáne olardyń enshiles kompaniialarynyń direktorlar keńesine, sondai-aq, óńirlik áleýmettik kásipkerlik korporatsiialardyń direktorlar keńesine engizýdi usynamyn», - dedi Qojahmetov.
Eske sala ketsek, búgin elordada Qazaqstan Prezidenti Qasym-Jomart Toqaevtyń tóraǵalyǵymen Ulttyq qoǵamdyq senim keńesiniń alǵashqy otyrysy ótti.
«Qazaqstan Prezidenttik basqarý formasyndaǵy memleket retinde qalýy kerektigine senimdimin. Alaida Parlament saiasi júiedegi laiyqty ornyn alýy qajet», - dedi jiynda Prezident. Sondai-aq, Memleket basshysy Qazaqstanda saiasi reformalar qajettiligi pisip-jetilgenin málim etti.
