Ulttyq qoǵamdyq senim keńesiniń múshesi, qoǵam qairatkeri Raýan Kenjehanuly balalar arasyndaǵy sýitsid máselesin kóterdi, dep habarlaidy QazAqparat.
«Taǵy bir nazar aýdaratyn másele - balalardyń jan saýlyǵyna qatysty. Atap aitsaq, mektep oqýshylary arasyndaǵy sýitsid, iaǵni ózine qol salýdyń jiiligi. Ókinishke qarai, bul kórsetkish boiynsha Qazaqstan dúnie júzindegi jaǵdaiy eń nashar elder qatarynda. Jyl saiyn 170-ten asa qazaqstandyq jasóspirim ózderin ómirden aiyrady. Mamandardyń esebinshe aiaqtalmaǵan jáne túrli sebeppen tirkelmegen sýitsidke talpynys sany budan 20 ese kóp. Ashyǵyn aitqanda, balalar arasyndaǵy mundai jaǵdai - qoǵam saýlyǵynyń óte soraqy kórsetkishi», - dep atap ótti spiker Ulttyq qoǵamdyq senim keńesiniń onlain formattaǵy 3-otyrysynda.
Sonymen birge, spiker balalar arasyndaǵy sýitsidtiń aldyn alýǵa baǵyttalǵan ortaq baǵdarlama ne biryńǵai ádisteme jasalmaǵanyn aitty.
«Qurmetti Qasym-Jomart Kemeluly! Siz bul másele týraly birneshe ret aittyńyz, tapsyrma da berdińiz. Alaida elimizde bilim berý jáne densaýlyq saqtaý júielerin qamtityn, barlyq deńgeide basshylyqqa alynýy tiis balalar arasyndaǵy sýitsidtiń aldyn alýǵa baǵyttalǵan ortaq baǵdarlama ne biryńǵai ádisteme áli qabyldanbady. Biz óz tarapymyzdan bilikti qazaqstandyq jáne bedeldi halyqaralyq psiholog mamandardy jumyldyryp, «Densaýlyq jáne ómir daǵdylary» atty arnaiy baǵdarlama daiyndadyq. Ondaǵy amaldar men ádister birneshe aimaqta synaqtan ótti. Qajet bolsa, baǵdarlamany tiisti ministrlikke tapsyrýǵa daiynbyz. Tek el aimaqtarynyń barlyǵyn, oqýshylar men ustazdardy, psihologtar men ata-analardy jan-jaqty qamtityn belsendi is-qimyl bastaýdy suraimyz», - dedi Raýan Kenjehanuly.
Buǵan deiin Raýan Kenjehanuly Qazaqstan mektepterin bir aýysymda oqý rejimine kóshirý joldaryn aitty jáne Qazaqstanda ulttyq mektep úlgisin jasaýdy usyndy.
