Ulttyq qoǵamdyq senim keńesiniń múshesi Asylbek Qojahmetov JOO-lar boiynsha granttardy aldymen tabysy tómen otbasylardan shyqqan jastarǵa bólýdi usyndy, dep habarlaidy QazAqparat.
«Men joǵary bilimdi damytýdyń kontseptýaldy usynystaryn ázirledim. Bul salany keńirek baǵalaý úshin elde úsh ańyz baryn atap ótý kerek: birinshi ańyz – «elde stýdentterdiń sany óte kóp». Shynynda da million halyqqa eseptegende bizde stýdentter sany AQSh-tan qaraǵanda eki ese, Malaiziiadan qaraǵanda bir jarym ese az. Ekinshi ańyz – «Qazaqstanda qazirgi tańda JOO-lar sany óte kóp». Shyntýaitynda Qazaqstanda AQSh, Frantsiia men Reseiden qaraǵanda (halyq sanymen eseptegende) olardyń sany az. Úshinshi ańyz – Qazaqstanda bilim sapasy tiimsiz. Aitarym bizde bul salaǵa bólinetin qarajat tym az. Bul salaǵa qarajat bólý jaǵynan (3,3 paiyz) álemde biz 39- oryndamyz», - dedi Asylbek Qojahmetov Ulttyq qoǵamdyq senim keńesiniń kezekti otyrysynda.
Onyń aitýynsha Malaiziia qorǵanysqa qaraǵanda bilimge 13 ese, Koreia 8 ese, Grýziia 5, Qazaqstan 3 ese artyq qarajat bóledi.
Osyndai máselelerdi tize kele Ulttyq keńes múshesi Asylbek Qojahmetov JOO-larda bilim granttaryn tabysy az otbasylardan shyqqan jastarǵa berý kerektigin aityp ótti.
«Máselen biyl Oksford pen Kembridj ýniversitetterine sol eldiń Úkimeti kedei otbasylardan shyqqan balalardyń úlesi jalpy abitýrientterdiń 7 paiyzyna teńesýi kerektigin tapsyrdy. Áleýmettik lift jumys isteýi úshin biz de memlekettik granttardy tabysy az otbasylardan shyqqan balalarǵa berýimiz kerek», - dedi ol.
