Memleket basshysynyń kómekshisi Erlan Qarin QR Prezidenti janyndaǵy Ulttyq qoǵamdyq senim keńesiniń usynysymen zańǵa engizilgen mańyzdy bastamalardyń birin atady, dep habarlaidy "Ult aqparat".
«Ulttyq keńestiń «qorjynynda» júzege asyrylǵan taǵy bir mańyzdy bastamalardyń biri – búgin Májilis paidalanylmai jatqan aýylsharýashylyq jerleriniń bazalyq salyqtyq stavkasyn arttyrý bastamasyn bekitti. Bul bastamany Prezident Qasym-Jomart Toqaev 2019 jyldyń 20 jeltoqsanynda Ulttyq qoǵamdyq senim keńesiniń ekinshi otyrysynda kótergen bolatyn. Sol kezde Memleket basshysy Úkimetke jerdiń tiimdi paidalanylýyna baqylaýdy kúsheitýdi, onyń ishinde paidalanylmai jatqan jer úshin bazalyq salyqtyq stavkany 10-nan 20 ese arttyrýdy tapsyrǵan edi», - dep jazdy Erlan Qarin Facebook-paraqshasynda.
Memleket basshysynyń tapsyrmasyn oryndaý úshin bul shara salyq salý máseleleri boiynsha qazirgi zańnamaǵa ózgeris engizýdi kózdeitin zań jobasyna engizilgen. Osynyń nátijesinde búgin, iaǵni 23 qyrkúiekte Parlament Májilisiniń depýtattary ekinshi oqylymda «Salyq salý jáne investitsiialyq klimatty jaqsartý boiynsha Qazaqstan Respýblikasynyń keibir zańnamalyq aktilerine ózgerister men tolyqtyrýlar engizý týraly» zań jobasyn maquldaǵan.
«Osy zań jobasyna sáikes jerdiń tiimsiz paidalanylýyna qatysty sharalardy kúsheitý maqsatynda 2022 jyldyń 1 qańtarynan bastap paidalanylmai jatqan aýylsharýashylyq jerleri úshin bazalyq salyqtyq stavka 10-nan 20 ese artatyn boldy. Sonymen birge Prezidenttiń bastamasymen osy jyldyń kókteminde 4 óńirde (Aqmola, Qostanai, Shyǵys Qazaqstan jáne Mańǵystaý oblystary) jaiylym jerlerdi ǵaryshtan monitoringileý boiynsha pilotty joba iske qosyldy. Osynyń arqasynda tiimdi paidalanylmai jatqan 7 million gektar jer memleketke qaitaryldy», - deidi ol.
