Ulttyq ǵylymi keńesterdiń quramy zańdy óreskel buza otyryp jasaqtalǵan. Bul týraly búgin QR Memlekettik qyzmet isteri jáne sybailas jemqorlyqqa qarsy is-qimyl agenttigi Sybailas jemqorlyqqa qarsy saiasat departamentiniń direktory Daniiar Sabyrbaev aitty, dep habarlaidy QazAqparat tilshisi.
"Agenttik ótken jyldyń qyrkúieginde Ǵylym komiteti qyzmetindegi jemqorlyq táýekelderge saraptama júrgizgen bolatyn. Nátijesinde kelesi jemqorlyq táýekelder anyqtaldy: komitet basshylyǵy tarapynan álsiz vedomstvolyq baqylaý baiqalady. Bul komitet qyzmetshileri tarapynan da, baǵynyshty uiym qyzmetkerleri tarapynan da kóptegen zańnama buzýshylyqqa alyp keledi", - dedi ol.
Onyń atap ótýinshe, komitet jumysyndaǵy negizgi jemqorlyq táýekelder ulttyq ǵylymi keńester qyzmetin úilestirýde baiqalady. Atalǵan keńester 7 baǵytta qurylǵan. Olardyń negizgi qyzmetteri respýblikalyq biýdjet esebinen granttar boiynsha sheshim qabyldaý.
"Mynadai problemalar anyqtaldy. Birinshi, qazirgi jumys istep turǵan keńesterdiń quramy zańnamany óreskel buza otyryp jasaqtalǵan. Ulttyq ǵylymi keńester týraly erejeniń 11 tarmaǵyna sáikes olardyń quramyna ǵylymi nemese ǵylymi-tehnikalyq qyzmettiń akkredittelgen sýbektileriniń basshylary, olardyń orynbasarlary, bir uiymnan birden artyq qyzmetker kirmeýi qajet. Degenmen, bul talap saqtalmaǵan", - dedi departament basshysy.
Máselen, Aqparattyq, telekommýnikatsiialyq jáne ǵaryshtyq tehnologiialar, tabiǵi ǵylymdar salasyndaǵy ǵylymi zertteýler baǵytyndaǵy ulttyq ǵylymi keńes tóraǵasy Qalimoldaev Aqparattyq jáne esepteý tehnologiialary institýtynyń direktory qyzmetin atqarady. Keńes quramyna Ulttyq biotehnologiia ortalyǵynyń eki qyzmetkeri kiredi. Osylaisha, UǴK-niń qazirgi quramyn zańsyz dep esepteýge bolady.
"Komitet bul buzýshylyqty joiý úshin eshqandai shara qabyldamai otyr. Buǵan qosa, bul múddeler qaqtyǵysyna alyp keledi. Ol keńes sheshimderimen dáleldengen. Máselen, Qalimoldaev basqaratyn Aqparattyq jáne esepteý tehnologiialary institýty 1 mlrd 384 mln teńge nemese bul baǵytta bólingen barlyq qarjylandyrýdyń 24 paiyzyn alyp otyr. Buǵan qosa, atalǵan institýtqa 447 mln teńgeniń 16 jobasy maquldanǵan", - dedi D.Sabyrbaev.
