Foto: parlam.kz
Aqylbek Kúrishbaev Ulttyq ǵylym akademiiasynyń prezidenti laýazymyna taǵaiyndaldy, - dep habarlaidy "Ult aqparat".
"Memleket basshysynyń ókimimen Aqylbek Qajyǵululy Kúrishbaev Qazaqstan Respýblikasynyń Ulttyq ǵylym akademiiasynyń prezidenti laýazymyna taǵaiyndaldy", - delingen Aqordanyń resmi saitynda.
Bul rette, Memleket basshysynyń ókimimen Kúnsulý Daltonqyzy Zakariia Qazaqstan Respýblikasy Prezidentiniń ǵylym jáne innovatsiialar máseleleri jónindegi keńesshisi bolyp taǵaiyndaldy, ol burynǵy atqarǵan laýazymynan bosatyldy.
Aita keteiik, Aqylbek Kúrishbaev 1961 jyly 13 sáýirde Almaty qalasynda dúniege kelgen.
Aýyl sharýashylyǵy ǵylymdarynyń doktory, professor, Qazaqstan Respýblikasy Ulttyq ǵylym akademiiasynyń jáne Resei aýylsharýashylyq ǵylymdary akademiiasynyń akademigi. A. I. Baraev atyndaǵy syilyqtyń laýreaty, 200-den asa jariialanymnyń, 4 monografiianyń avtory.
1983 jyly Aqylbek Kúrishbaev Qazaq aýylsharýashylyq institýtyn "Agrohimiia jáne topyraqtaný" mamandyǵy boiynsha úzdik bitirdi.
1977 jyly eńbek jolyn Almaty oblysy Talǵar aýdanyndaǵy MRSHO birlestiginde kombainer bolyp bastaǵan.
1983 jyly V.Viliams atyndaǵy Qazaq eginshilik ǵylymi-zertteý institýtynyń laboranty bolǵan.
1984 jyly aspirantýraǵa oqýǵa túsken.
1986 – 1997 jyldar aralyǵynda V.Viliams atyndaǵy Qazaq eginshilik ǵylymi-zertteý institýtynda kishi ǵylymi qyzmetker, kásipodaq tóraǵasy, aǵa ǵylymi qyzmetker, direktordyń ǵylym jónindegi orynbasary laýazymdarynda qyzmet atqarǵan.
1997 – 2002 jyldary A.I.Baraev atyndaǵy astyq sharýashylyǵy ǵylymi-zertteý institýtynyń direktory bolǵan.
2002 – 2005 jyldary Qazaqstan Respýblikasynyń Aýyl sharýashylyǵy vitse-ministri laýazymyn atqarǵan.
2006 jyly QR AShM Ǵylym departamentiniń direktory bolyp taǵaiyndalǵan.
2007 jyly Qazaqstan Respýblikasynyń Aýyl sharýashylyǵy vitse-ministri bolyp qaita taǵaiyndalǵan.
2008 – 2011 jyldary Qazaqstan Respýblikasynyń Aýyl sharýashylyǵy ministri laýazymyn atqarǵan.
2011 – 2020 jyldary "S.Seifýllin atyndaǵy Qazaq agrotehnikalyq ýniversiteti" Aktsionerlik qoǵamynyń Basqarma Tóraǵasy bolǵan.
2020 jyl tamyz aiy – 2022 jyly qazan aiy aralyǵynda Qazaqstan Respýblikasy Parlamenti Senatynyń depýtaty bolǵan.
2022 jyly 1 qarashada "Qazaq Ulttyq agrarlyq zertteý ýniversiteti" KeAQ Basqarma Tóraǵasy – Rektory laýazymyna taǵaiyndaldy.
