Foto: gov.kz
Ulttyq ekonomika vitse-ministri Iliias Óserov úiqamaqqa alyndy. Bul týraly Almaty qalasynyń mamandandyrylǵan aýdanaralyq tergeý sotynyń baspasóz qyzmeti habarlady.
"10 sáýirde Almaty qalasynyń mamandandyrylǵan aýdanaralyq tergeý sotyna QR Sybailas jemqorlyqqa qarsy is-qimyl agenttiginiń vedomstvoaralyq jedel-tergeý toby basshysynyń kúdikti I.Ýserovqa qatysty eki ai merzimge úi qamaǵyna alý túrindegi bultartpaý sharasyn qoldaný týraly Almaty qalasy prokýrorynyń orynbasarymen kelisilgen ótinishi kelip tústi.
Joǵaryda atalǵan ótinish qanaǵattandyrylyp, kúdiktige qatysty eki ai merzimge, iaǵni 2023 jyldyń 10 maýsymyna deiin bultartpaý sharasy qoldanyldy", - delingen habarlamada.
Eske salaiyq, buǵan deiin Sybailas jemqorlyqqa qarsy qyzmet Ulttyq ekonomika vitse-ministri Iliias Óserovke qatysty tergeý bastalǵanyn habarlaǵan bolatyn.
Aita keteiik, Iliias Óserov 1985 jyly Almaty qalasynda týǵan. Ál-Farabi atyndaǵy Qazaq ulttyq ýniversitetin, T. Rysqulov atyndaǵy Qazaq ekonomikalyq ýniversitetin, Turan-Astana Ýniversitetin bitirgen.
Eńbek jolyn 2007 jyly «Sberbank» AQ ákimshisi, jetekshi mamany, menedjeri bolyp bastady. 2009-2010 jj. – QR Ekonomika jáne biýdjettik josparlaý ministrliginiń Investitsiialyq saiasat departamentinde túrli laýazymdar atqardy. 2010-2013 jj. – QR Ekonomikalyq damý jáne saýda ministrliginiń Investitsiialyq saiasat departamentiniń sarapshysy, bas sarapshysy. 2013-2014 jj. – QR Ekonomika jáne biýdjettik josparlaý ministrliginiń basqarma basshysy. 2014-2015 jj. – Qarjy, aqparattandyrý jáne aqparattyq resýrstardy qorǵaý departamenti Aqparattyq qaýipsizdik basqarmasynyń bas sarapshysy; QR Bas prokýratýrasy janyndaǵy Materialdyq-tehnikalyq qamtamasyz etý basqarmasynyń basshysy. 2015-2019 jj. – Almaty qalasy Ekonomika jáne biýdjettik josparlaý basqarmasy basshysynyń orynbasary, basshysy. 2019 jyly Almaty qalasy Ekonomika jáne biýdjettik josparlaý basqarmasynyń basshysy boldy.
Óserov 2019 jylǵy mamyrdan 2022 jylǵy naýryzǵa deiin Almaty ákiminiń orynbasary boldy, sodan keiin, 2022 jylǵy naýryzda Ulttyq ekonomika vitse-ministri bolyp taǵaiyndaldy.
