Búgin – Ulttyq dombyra kúni. Jaqynda ǵana Elbasy Nursultan Nazarbaevtyń jarlyǵymen shilde aiynyń alǵashqy jeksenbisi Ulttyq dombyra kúni bolyp bekitilgen bolatyn. Osynaý merekeni kúlli qazaq eli qýanyshpen toilaýda.
Memleket basshysynyń qatysýymen «Qazaq eli» monýmentiniń aldynda uiymdastyrylǵan kontsertte 2 myńnan astam ónerpaz kúi tartyp, dombyra únin áýeletti.
Oryndaýshylar arasynda kópshilikpen birge ministrler men Parlament depýtattary da boldy. «Kóńilashar», «Adai», «Saryarqa», «Balbyraýyn» sekildi belgili kúiler shertilip, Astana aspanyn alash rýhy kernedi.
Mereili merekege Qurmanǵazy atyndaǵy Qazaq memlekettik ulttyq aspaptar orkestriniń, «Otyrar sazy» folklorlyq-etnografiialyq ulttyq aspaptar orkestriniń, Astana qalasy memlekettik akademiialyq filarmoniiasynyń ulttyq aspaptar orkestriniń, Táttimbet atyndaǵy akademiialyq halyq aspaptary orkestriniń, Aqtaý qalasynyń qazaq ulttyq aspaptary orkestriniń ártisteri eleýli úles qosty. Atyraý, Oral, Aqtóbe, Qaraǵandy, Pavlodar, Petropavl, Kókshetaý, Qostanai jáne Jambyl oblysynyń dombyrashylary belsendi atsalysty. «Asyl», «Mýzart» toptarynyń ónerpazdary áýeletip án saldy.
Dál osy kúni Qazaqstan halqy Asambleiasynyń bastamasymen «Qasietti dombyra» aktsiiasy uiymdastyrylyp, «Ulttyq dombyra kúni» týǵan nárestelerge dombyra syiǵa tartyldy.
1 shilde kúni elimizdiń ár óńirinde dúniege kelgen sábilerge dombyra tabystalyp, «Ulttyq dombyra kúni» merekesiniń toilanýyna erekshe reńk ústedi.
Atalǵan aktsiianyń maqsaty – qazaqtyń ulttyq aspaby dombyrany nasihattaý arqyly ulttyq mádenietti saqtaý jáne jandandyrý bolatyn.
Aimaqtardaǵy Asambleia ókilderi perzenthanalardy aralap, nárestelerge syi jasap, ana-analar alǵysyn aldy.
Al, el ordasy Astanada Assambleia tóraǵasynyń orynbasary – Hatshylyq meńgerýshisi L. Prokopenko «Ulttyq ana men bala ǵylymi ortalyǵynda» bolyp, aitýly datada alǵash dúniege kelgen nárestege QHA logotipi beinelengen qasietti dombyrany syiǵa tartty.
«Búgin elimizde alǵash atalyp jatqan «Ulttyq dombyra kúni» Astananyń 20 jyldyq mereitoiymen tuspa-tús kelip otyr. Bul barsha qazaqstandyqtardy biriktiretin mereke. Dombyra – qazaq halqynyń ulttyq simvoly. Ár adamnyń ómirinde óte mańyzdy ról atqarady», – deidi Leonid Prokopenko.
Ulttyq dombyra kúni ómirge kelgen kishkentaiǵa ata-anasy «Han» degen esim bermek. Qasietti dombyra Hannyń anasy Alýa Bekbotaǵa amanat etip tabystalyp, sábi on saýsaǵynan óner tamǵan ónerpaz bolsyn dep yrymdaldy.
«Ulttyq dombyra kúniniń belgilenýi barshamyzdy erekshe qýantyp otyr. Elbasynyń qoldaýymen júzege asyp jatqan aitýly kún ulttyq mádeniet pen biregeilikti saqtaý, qaita jańǵyrtý ideiasynyń tóńireginde qoǵamdy odan ári toptastyra túsedi. Eldegi igi bastamalarǵa únemi qoldaý kórsetip kele jatqan etnomádeni birlestikterdiń músheleri búgin dúniege kelgen sábilerge qazaqtyń qasietti dombyrasyn tartý etip, izgi tilegimizdi arnadyq», - deidi Assambleia ókilderi.
Bul bastama Elbasynyń «Rýhani jańǵyrý» baǵdarlamasynyń negizgi ideiasymen úndese sabaqtasady. Ulttyq dombyra kúnine orailastyrylǵan «Qasietti Dombyra» aktsiiasyn Qazaqstan halqy Assambleiasynyń «Qoǵamdyq kelisim» uiymy uiymdastyryp otyr. Aktsiiaǵa Densaýlyq saqtaý basqarmasy qoldaý bildirgen.
Assambleianyń jańa aktsiiasy kópshilik qaýym tarapynan da qyzý qoldaý taýyp, erekshe yqylasqa ie boldy. Dombyra – qazaqtyń qasieti, jany, bolmysy. Endeshe, ár shańyraqtyń tórinde dombyra ilinip, kúii kúmbirlep, áni shalyqtap jatsa, qanekei!
