Eńbek jáne halyqty áleýmettik qorǵaý birinshi vitse-ministri Aqmádi Sarbasov ortalyq kommýnikatsiialar qyzmetinde ótken brifingide Ulttyq biliktilik júiesi ne úshin engizilip jatqanyn túsindirdi, dep habarlaidy QazAqparat.
Onyń aitýynsha, búgingi tańda eńbek naryǵy tehnologiialyq progresti jedeldetý, ekonomikany tsifrlandyrý siiaqty jahandyq trendterdiń yqpalymen ózgeristerge ushyrap, sonyń saldarynan jumys berýshilerdiń talaptary men bolashaq mamandardyń biliktiligi arasynda alshaqtyq qalyptasyp otyr. Osyǵan bailanysty qazaqstandyqtardyń kásibi bilimderin, daǵdylary men quzyretterin únemi jańartyp otyrý qajettigi týyndaǵan
«Ekonomikalyq yntymaqtastyq jáne damý uiymynyń sarapshylary Qazaqstandaǵy eresek turǵyndardyń úzdiksiz bilim alýǵa az tartylǵanyn atap ótti. Máselen, 2018 jyly eresek halyqtyń tek 17%-y (16-65 jas) beiresmi oqytýǵa qatysqan. Bul rette áielderdiń qatysý úlesi erlerge qaraǵanda joǵary (13,85 jáne 20%)», - deidi ministrdiń birinshi orynbasary.
Aqmádi Sarbasovtyń aitýyna qaraǵanda, buryn dástúrli joldarmen alynǵan bilimmen 10 jyl boiy biliktilikti arttyrmai-aq jumys isteýge bolatyn. Al qazir kóptegen mamandyqtar boiynsha daǵdylardyń ózektiligi tek 2 jyl kóleminde ǵana saqtalady.
«Qazaqstanda jumyspen qamtylǵandardyń 4-5%-y ǵana jyl saiyn kásiptik oqýǵa nemese jalpy damytý kýrstaryna qatysady. Osy máselelerdi sheshý úshin bizdiń ministrlik Ulttyq biliktilik júiesin damytý boiynsha josparly jumys júrgizýde», – dedi vitse-ministr.
