"Atameken" ulttyq kásipkerler palatasy biznes úshin kreditterdi qoljetimdi etý úshin bazalyq stavkany tómendetýdi usyndy, dep habarlaidy Sputnik Qazaqstan.
"Ókinishke qarai, Ulttyq banktiń saiasaty túsinbestik týdyrady. 2016 jyly JIÓ-degi kreditterdiń úlesi 36% bolǵan edi. Al qazir nesieleý úlesi – 19%. Biz Eýraziialyq ekonomikalyq odaqta eń sońǵy oryndardyń birinde turmyz. Reseide bul kórsetkish 40 protsentten asady, Ekonomikalyq yntymaqtastyq jáne damý uiymy elderin, tipti, aitpai-aq qoiaiyn. Infliatsiialyq máselelerdiń jartysy monetarlyq emes, bizdiń importqa táýeldiligimiz ben tariftiń ósýi ekenin túsinemiz", - dedi "Atameken" ulttyq kásipkerler palatasynyń basqarma tóraǵasy Abylai Myrzahmetov senatta ótken parlamenttik tyńdaýda.
Aitýynsha, aqsha-nesie saiasatyn rettep, bazalyq stavkany tómendetý kerek. Sondai-aq, Myrzahmetov ekinshi deńgeili bankter negizgi ról atqarýdy qoiǵan dep otyr. Búginde bankterdiń portfelinde tek 43%-i ǵana kreditter, qalǵany qazynalyq jáne basqa operatsiialar.
"Bankter óziniń basty rólin atqarýdy qoidy. Sol sebepti bazalyq stavkany tómendetý qajet dep esepteimiz", - dedi ol.
Buǵan deiin senat depýtaty Dáýren Ádilbekov bankterdiń memlekettiń kómeginsiz shaǵyn jáne orta bizneske kredit berýge qulyqsyz ekenin málimdegen edi. Aitýynsha, qazaqstandyq bizneske kredit qajet. Ol úshin Ulttyq bank bazalyq stavkany tómendetýi kerek. Alaida, Ulttyq bank bul infliatsiianyń ósýine ákep soǵady dep sanaidy.
