Apta basynda bir dollarǵa shaqqandaǵy baǵam 427,98 teńge bolsa, búgin ulttyq valiýta qyrkúiek aiynan beri alǵash ret 423 deńgeiine jetti. Ulttyq banktiń Monetarlyq operatsiialar departamentiniń direktory Nurjan Tursynhanov valiýta naryǵyndaǵy ahýalǵa túsinik berdi, dep habarlaidy "Ult aqparat".
«25 qarashada dollar teńgege qatysty birjada orta eseppen 422,90 deńgeiinde saýdalanyp jatyr. Aptanyń basynan beri ulttyq valiýtanyń baǵamy 5 teńgeden astamǵa nemese 1,2% nyǵaidy. Teńgeniń oń serpini qolaily syrtqy koniýnktýra, sondai-aq eksporttaýshylardyń salyq tólemderin jasaý úshin shetel valiýtasyn satýy aiasynda qalyptasýda.
Aptanyń basynan bastap syrtqy jaǵdailar jahandyq táýekel-sentimentiniń jaqsarýymen sipattalady. Investorlar koronavirýsqa qarsy ázirlenip jatqan vaktsinalardyń tiimdiligi týraly habarlamalardy oń baǵalaýda. Bul, ekonomikalyq belsendiliktiń tez qalypqa kelý yqtimaldyǵyn arttyrady. Onymen qosa, Donald Tramp ákimshiliginen sailanǵan prezident Djo Baidenge bilikti formaldy berý protsesiniń bastalýy da táýekel dárejesin ustap tur. Sonymen birge naryqtar FRJ-niń burynǵy basshysy D.Iellendi AQSh Qarjy ministri laýazymyna taǵaiyndaý perspektivalaryna oń yqpal etýde, bul qarjylyq yntalandyrýǵa bailanysty bolyp otyr», - dedi Ulttyq bank ókili.
Onyń aitýynsha, jedel vaktsinatsiia jáne otynǵa degen suranystyń jedel qalpyna kelýi – munai baǵasynyń ósýine yqpal etýde.
«Brent etalondyq surypty munaidyń álemdik baǵasy birneshe kún qatarynan ósip keledi jáne Aziia naryqtaryndaǵy búgingi saýda-sattyq barysynda naýryzdyń basynan bastap alǵash ret bir barrel úshin 48 dollar belgisinen asty. Osyǵan orai, Norvegiia krony men Kanada dollary siiaqty shikizat elderiniń valiýtalary aptanyń basynan bastap 1,3% jáne tiisinshe 0,6% nyǵaidy.
EIA energetikalyq agenttiginiń málimetteri boiynsha, jýyq arada suranysqa qaita ie bola bastaityny aldyn ala boljanǵanyna qaramastan, AQSh-taǵy munai qory artyp keledi. Máselen, osy aidyń basynan 13 qarashaǵa deiin AQSh-ta shiki munai qory barreline 484,4 mln-nan 489,5 mln-ǵa deiin ósti.
Syrtqy pozitivtiń áserinen bólek, osy apta – salyq aptasy bop qalady, bunyń ózi naryqta valiýtanyń usynysyn edáýir kúsheite tústi. Mysaly, dúisenbi, 23 qarasha kúni birjadaǵy saýda kólemi 170 mln dollarǵa jetti. Bul – osy qarashada birjada tirkelgen kúndizgi orta kólemnen 1,5 ese kóp degendi kórsetedi», - dedi N.Tursynhanov.
Onyń sózinshe, damýshy elderdegi valiýtalar syrtqy naryqtaǵy jaǵdailarǵa, meiilinshe, jaqsy áser etip otyr.
«Apta basynda ońtústik afrikalyq rand 1,3% bekise, Resei rýbli 1%, Meksika pesosy 0,3% nyǵaia tústi. Bul jerde rýbldiń ózi eksporterlerdiń tarapynan túsken salyq esebinen nyǵaiyp otyr. Al, teńge syrtqy jáne ishki faktorlardyń jailylyǵynan, odan qaldy, táýekel-sentiment pen naryqtaǵy energotasymaldaýshylardyń pozitivti jańalyqtarynyń jáne jer qoinaýyn paidalanýshylar tarapynan túsken kólemdi salyqtardyń arqasynda bekip tur. Bul jerde munai baǵasynyń kóterilýi – ony tutyný deńgeiin der kezinde qalpyna keltirýge sebepshi bolyp jatatynyn aita ketý kerek. Degenmen AQSh-taǵy munai qorynyń esebi kórsetip kelgendei, tutyný kólemi boljaldy deńgeige kóterile almai otyr. Sol sebepti, shynaiy tutynymnyń shamasyna qarai kómirsýtek baǵasyna da ózgerister enip turýy múmkin», - dep túiindedi Ulttyq banktiń Monetarlyq operatsiialar departamentiniń direktory Nurjan Tursynhanov.
