Ulttyq bank naýryzda teńge baǵamyn ustap turýǵa qansha jumsalǵanyn jáne sáýirde ulttyq valiýta quny nege bailanysty bolatynyn aitty, - dep habarlaidy Tengrinews.kz agenttigi.
Ulttyq bank málimetinshe, syrtqy kútpegen ózgeristerdiń el ekonomikasyna yqpalynyń aldyn alyp, ishki valiýta naryǵyndaǵy teńgerimdi ustap turý úshin naýryzdyń birinshi jartysynda Ulttyq bank valiýtalyq interventsiialardy júrgizgen.
"Aidyń aiaǵynda olardyń kólemi 990,5 million AQSh dollaryn nemese birjalyq saýda-sattyqtaǵy jalpy kólemniń 29 paiyzy qurady. Ulttyq qordan respýblikalyq biýdjetke transfertterdi qamtamasyz etý úshin valiýta satý naýryzda 890,9 million AQSh dollary boldy. Ulttyq banktiń valiýtalyq interventsiialary men Ulttyq qordan satý úlesi jalpy kólemniń 55 paiyzy boldy", - delingen habarlamada.
UB málimeti boiynsha, Ulttyq bank BJZQ men senimgerlik basqarýdaǵy basqa da qorlardyń zeinetaqy aktivteri úshin shetel valiýtasyn satyp alý nemese satý boiynsha operatsiialardy júrgizbegen.
"Geosaiasi shielenistiń joǵary deńgeiine bailanysty 2022 jylǵy 15 naýryzdaǵy jaǵdai boiynsha, teńge tarihi eń joǵary deńgeige jetip, bir AQSh dollary úshin 512,17 teńge boldy. Alaida osydan keiin ulttyq valiýta qozǵalysynyń baǵyty nyǵaiý jaǵyna qarai ózgerdi. Osylaisha, 31 naýryzda KASE birjasynda saýda qorytyndylary boiynsha teńge baǵamy naýryzdyń basynan bastap 5,7 paiyzǵa nyǵaiyp, bir AQSh dollary úshin 467,03 teńge deńgeiinde qalyptasty. Halyqaralyq qarjy naryqtaryndaǵy túzetý, sondai-aq salyqtyq tólemder kezeńi aiasynda teńge nyǵaia tústi", - delingen UB habarlamasynda.
Qysqa merzimdi perspektivada teńgeniń qubylmalylyǵy geosaiasi jaǵdaidyń ózgerýine, ishki qatysýshylardyń kútýlerine jáne álemdik naryqtardaǵy ahýalǵa bailanysty bolǵany atap ótildi.
"Bul rette Ulttyq bank ekonomikadaǵy qurylymdyq ózgerister, memlekettiń jeńildikpen kreditteýiniń azaiýy, sondai-aq aiyrbastaý baǵamynyń erkin ózgerý qaǵidattaryn ustaný qajetti talaby sanalatyn infliatsiialyq targetteýdiń tolyqqandy rejimine kóshý jumysyn jalǵastyryp jatyr.
Ulttyq bank teris stsenarii oryndalǵan jaǵdaida ishki qarjy naryǵynda turaqsyzdanýdyń aldyn alýǵa qajetti barlyq quralǵa ie jáne jaǵdaidy qadaǵalaýdy jalǵastyrady", - delingen habarlamada.
