Senattyń jalpy otyrysynda QR Ulttyq banki tóraǵasynyń orynbasary Aqyljan Baimaǵambetov infliatsiiaǵa qatysty túsinik berdi, dep habarlaidy QazAqparat.
«Baǵa turaqtylyǵyn qamtamasyz etý aiasynda 2020 jyly Memleket basshysynyń tapsyrmasy boiynsha infliatsiia 8-8,5% sheginde ustalyp, 7,5% boldy. Qazaqstanda, sol siiaqty negizgi saýda áriptesteri bolyp sanalatyn elderde tótenshe jaǵdai rejimi men karantin sharalarynyń qoldanylýy jaǵdaiynda jetkizý tizbekteriniń buzylýy, sondai-aq taýarlardyń jekelegen toptaryna suranystyń artýy nátijesinde azyq-túlik baǵasynyń 11,3%-ǵa jedeldeýi 2020 jyly infliatsiianyń ósýine negizgi úles qosty. Infliatsiia qurylymynda azyq-túlikke jatpaityn taýarlar 2020 jyly 5,5%-ǵa, aqyly qyzmetter 4,2%-ǵa qymbattady», - dedi A. Baimaǵambetov Senatta 2020 jylǵy biýdjettiń atqarylýyna qatysty Úkimettiń jáne Esep komitetiniń esepterin qaraý barysynda.
Onyń aitýynsha, 2020 jylǵy maýsymnan bastap azyq-túlik baǵasynyń álemdik ósýiniń jalǵasýy infliatsiianyń ósýine zor úles qosty. Nátijesinde, osy jylǵy mamyr aiynda Birikken Ulttar Uiymynyń FAO indeksi 10 jyldyq maksimýmǵa – 127,1 tarmaqqa jetti.
«Jyldyq infliatsiia biylǵy jyldyń basynda 7% deńgeiinde turaqtanǵan soń, mamyrda 7,2%-ǵa deiin jyldamdady. Azyq-túlik taýarlaryna baǵa ósýiniń baiaýlaýynan bolǵan áser azyq-túlikke jatpaityn taýarlar men aqyly qyzmetter baǵasynyń aitarlyqtai ósýimen teńestirildi. Azyq-túlik infliatsiiasy 2020 jylǵy infliatsiianyń joǵary bazasy esebinen shyǵýǵa, nan-toqash ónimderi, et, qant jáne jemis-kókónis ónimderiniń baǵasyn ósirýdiń baiaýlaýyna bailanysty 11,3%-dan 9,3%-ǵa deiin baiaýlady. Bul rette jekelegen taýar naryqtaryndaǵy baǵalarǵa áser etetin teńgerimsizdik saqtalýda», - dedi UB ókili.
Onyń sózine qaraǵanda, azyq-túlikke jatpaityn infliatsiia kiim-keshek pen aiaq kiim baǵasynyń 5,9%-ǵa, benzin baǵasynyń 12,7%-ǵa deiin ósý qarqynynyń jedeldeýine bailanysty 6,7%-ǵa deiin jyldamdady. Azyq-túlikke jatpaityn taýarlar baǵasynyń jyldyq ósý qarqynynyń jyldamdaýy tutynýshylyq suranys pen iskerlik belsendiliktiń birtindep qalpyna kelýi aiasynda importtyq baǵanyń ósýine bailanysty oryn aldy. Nátijesinde, azyq-túlikke jatpaityn taýarlar baǵasynyń ósýine janar-jaǵarmai materialdarynyń, kiim-keshek pen aiaq kiimniń qosqan úlesi osy jylǵy aqpan aiyndaǵy 1,7 paiyzdyq tarmaqtan mamyr aiyndaǵy 3,5 paiyzdyq tarmaqqa deiin 3 aida 2 ese ósti.
«Biylǵy jylǵy mamyrda halyqqa aqyly qyzmet kórsetý baǵasynyń ósýi 5,1% boldy, negizinen elektr energiiasyna, turǵyn úi kommýnaldyq sharýashylyq qyzmetterine jáne áýe kóligimen ushýǵa baǵanyń ósýi baiqalady. Infliatsiia qalyptasýynyń negizgi faktorlary turaqty sipatqa ie emes. Biyl proinfliatsiialyq faktorlar tarapynan táýekelder iske asyrylǵan jaǵdaida Ulttyq bank aqsha-kredit talaptaryn kúsheitý jóninde sheshim qabyldaityn bolady», - dedi Aqyljan Baimaǵambetov.
«2022 jyly saýda áriptesteri bolyp sanalatyn elderdegi baǵanyń ósý áseriniń sarqylýy jáne syrtqy infliatsiialyq qysymnyń, onyń ishinde álemdik azyq-túlik naryqtaryn turaqtandyrý esebinen álsireýi boljanyp otyr, bul Qazaqstandaǵy infliatsiianyń 4-6% nysanaly dálizge enýine yqpal etetin bolady. Monetarlyq talaptar infliatsiianyń baiaýlaýyna qarai orta merzimdi perspektivada beitarap mánderge jýyqtaityn bolady», - dedi ol.
