Ulttyq bank «Altyn barys» jáne «Kúmis barys» investitsiialyq monetalaryn ainalymǵa shyǵarady, dep habarlaidy "Ult aqparat".
2020 jylǵy 17 tamyzda Qazaqstan Ulttyq banki altynnan 10, 20, 50, 100, 200 jáne 500 teńge nominaldarynda, kúmisten 1, 2, 5 jáne 10 teńge nominaldarynda 2020 jyly soǵylǵan «ALTYN BARYS» jáne «KÚMIS BARYS» investitsiialyq monetalaryn ainalymǵa shyǵarady.
Investitsiialyq monetalar – 999,9 joǵary synamaly sapasy joǵary altyn jáne kúmis monetalar.
Búgingi tańda investitsiialyq monetalardyń birneshe iri brendteri bar – «Kriýgerrand» (Ońtústik Afrika), «Amerikalyq búrkit» (AQSh), «Vena filarmoniiasy» (Avstriia), «Panda» (Qytai), «Úieńki japyraǵy» (Kanada).
Qazaqstannyń alǵashqy investitsiialyq «JIBEK JOLY» monetalary 1996 jyly ainalysqa shyǵaryldy. 2009 jyldan bastap dizainynyń ózgerýine bailanysty túrli salmaq sipattamalary bar «ALTYN BARYS» jáne «KÚMIS BARYS» investitsiialyq monetalary shyǵaryla bastady.
Investitsiialyq monetalardyń erekshelikteri:
– shektelmegen taralymdar;
– «proof» tehnologiiasyn qoldanbai daiyndaý;
– moneta jasalǵan metaldyń quny men salmaǵyna bailanysty kiris alý;
– Ulttyq bank satý jáne satyp alý erejelerine sáikes satyp alý monetadaǵy metaldyń salmaǵy boiynsha esepteletindikten jaǵdaiyna (syzattar, patina jáne t.b.) qaramastan keri satyp alýǵa qabyldaidy;
– qosylǵan qunyna salyq salynbaidy.
Altyn men kúmisten jasalǵan barlyq nominaldardaǵy investitsiialyq monetalar Qazaqstan Respýblikasynyń búkil aýmaǵynda belgilengen quny boiynsha tólemderdiń barlyq túrleri boiynsha, sondai-aq bank shottaryna esepke jazý úshin jáne aýdarý úshin qabyldanýǵa mindetti. Sondai-aq, Qazaqstan Respýblikasynyń barlyq bankterinde shekteýsiz usaqtalady jáne aiyrbastalady.
