QR Ulttyq banki infliatsiia úrdisterine túsinik berdi, dep habarlaidy QazAqparat.
Aita keteiik, QR Ulttyq banki bazalyq mólsherlemeni 9,75%-ǵa deiin kóterý týraly sheshim qabyldaǵan edi.
«Negizgi saýda áriptes elderdegi infliatsiia joǵary deńgeide qalyp otyr. Qytaida kómir men energiiany kóp qajet etetin salalar ónimine baǵanyń joǵarylaýy nátijesinde óndirýshiler baǵasynyń indeksi 10,7%-ǵa deiin ósti. Biylǵy qyrkúiekte EO-da jyldyq infliatsiia 3,6%-ǵa deiin, Reseide – 7,4%-ǵa deiin jyldamdap, jyldamdaýyn jalǵastyrýda. Muny jyldyq mánde 7,8%-dy quraǵan qazandaǵy aptalyq infliatsiia kórsetip otyr», - delingen UB málimetinde.
Qazaqstanda 2021 jylǵy qyrkúiekte jyldyq infliatsiia 8,9% boldy. Údeý barlyq quramdas bólikterde baiqaldy. Tamaq ónimderine baǵanyń ósýi (8,9%-dan 4,5 p.t.) jyldyq infliatsiianyń jyldamdaýyna negizgi úles qosýda.
«Azyq-túlik infliatsiiasy jemis-kókónis ónimderi baǵasynyń maýsymdyq tómendeýine qaramastan, 2021 jylǵy qyrkúiekte jyldamdaýyn jalǵastyryp, jyldyq mánde 11,5% boldy. Jem-shóp daqyldary, dizel otyny, elektr energiiasy jáne bidai baǵasynyń kóterilýi kezinde óndirýshilerdiń ózindik qunynyń ósýi nátijesinde et (10,3%), nan-toqash (8,7%) jáne sút ónimderi (8%) baǵasynyń jyldyq ósýi azyq-túlik infliatsiiasynyń jedeldeýine negizgi serpin boldy. Álemdik baǵanyń ósýi qosymsha infliatsiiaǵa qarsy qysym kórsetedi. Máselen, 2021 jylǵy qyrkúiekte etke FAO indeksi jyldyq mánde 26,3%-ǵa deiin, sút ónimderine – 15,2%-ǵa deiin ósti, al bidaiǵa álemdik baǵanyń ósýi 41% boldy», - dep atalyp ótken habarlamada.
Budan bólek, 2021 jylǵy qyrkúiektiń qorytyndysy boiynsha azyq-túlikke jatpaityn infliatsiia jyldyq mánde 7,5% boldy. Osy jyldamdaýǵa úi turmysyndaǵy zattar, kiim-keshek pen aiaq kiim, janar-jaǵarmai (JJM) men qatty otyn baǵasynyń jyldyq ósýi negizgi úles qosady.
«Kiim-keshek pen aiaq kiim baǵasy importtyq taýarlar baǵasynyń joǵarylaýyna, tutynýshylyq suranystyń qalpyna kelýine jáne halyqtyń naqty aqshalai tabysynyń ósýine bailanysty artýda. Óz kezeginde, ózindik qunnyń ósýine jáne ekonomikalyq belsendiliktiń qalpyna kelýine bailanysty JJM men qatty otyn baǵasy artty», - delingen Ulttyq bank aqparatynda.
Aqyly qyzmetter infliatsiiasy 2021 jylǵy qyrkúiekte 6,8%-ǵa deiin jyldamdady. Dinamika retteletin qyzmetter baǵasynyń – 5,6%-ǵa, bilim berý qyzmetteri baǵasynyń – 8,4%-ǵa jáne turǵyn úidi jalǵa alý baǵasynyń – 18,6%-ǵa ósýine negizdelgen. Retteletin qyzmetter arasynda qyrkúiekte elektr energiiasy baǵasynyń 8,3%-ǵa jáne suiytylǵan gaz baǵasynyń 6,4%-ǵa ósýi baiqaldy.
