Qazaqstanda import aǵyny ulǵaiyp, taýarlar eksportynyń tómendeýi baiqaldy. Bul týraly Senattyń jalpy otyrysynda QR Ulttyq banki tóraǵasynyń orynbasary Aqyljan Baimaǵambetov málim etti, dep habarlaidy QazAqparat.
«2020 jyly tólem balansynyń aǵymdaǵy shot tapshylyǵy 6,3 mlrd AQSh dollary boldy. Aǵymdaǵy shottyń teris saldosy 1 mlrd AQSh dollaryna qysqarýy, birinshi kezekte, sheteldik investorlarǵa tólenetin kiristiń qysqarýyna, sondai-aq kiristerdi bólý jónindegi daýdy retteý aiasynda Qarashyǵanaq konsortsiýmyna qatysýshylardan valiýtanyń ákelinýine bailanysty boldy», - dedi Baimaǵambetov Senatta 2020 jylǵy biýdjettiń atqarylýyna qatysty Úkimettiń jáne Esep komitetiniń esepterin qaraý barysynda.
Onyń aitýynsha, osy jylǵy 1-toqsanda tólem balansynyń aǵymdaǵy shoty 1,2 mlrd AQSh dollary tapshylyǵymen qalyptasty. Import aǵynynyń ulǵaiýy kezinde taýarlar eksportynyń tómendeýi tapshylyqtyń negizgi sebebi bolyp otyr.
«Jalpy eksportta úlesi 48,5 paiyzdy quraǵan munai eksportyn qysqartý esebinen taýarlar eksporty 2,9 mlrd AQSh dollaryna tómendedi. Bul tómendeý 2020 jylǵy 4-toqsanda munaidyń salystyrmaly túrde tómen baǵasyna bailanysty boldy, bul resmi statistikada munai eksportyn esepke alý erekshelikterine bailanysty 2021 jylǵy 1-toqsandaǵy eksportta kórinis tapty», - dedi UB ókili.
Ulttyq bank málimetinshe, azyq-túlikke jatpaityn tutyný jáne investitsiialyq taýarlardyń ákelinýin ulǵaitý esebinen import 4,8 paiyzǵa ósti.
«Taýarlar importy iskerlik belsendilik pen keiinge qaldyrylǵan ishki suranystyń qalpyna kelýi aiasynda ósip keledi. Importtyń eń kóp ósýi avtomobilder, kiim-keshek jáne kompiýterler siiaqty taýarlardy ákelýde baiqaldy», - dedi Aqyljan Baimaǵambetov.
