Foto: QR UB
Qazaqstan Respýblikasy Ulttyq Bankiniń Aqsha-kredit saiasaty komiteti bazalyq mólsherlemeni +/– 1 p.t. dálizimen jyldyq 16%-ǵa deiin tómendetý týraly sheshim qabyldady, dep habarlaidy "Ult aqparat" vedomstvonyń baspasóz qyzmetine silteme jasap.
"Jyldyq infliatsiianyń baiaýlaý qarqyny joǵary. Syrtqy infliatsiialyq qysym ortalyq bankterdiń tejeý saiasaty men azyq-túliktiń álemdik baǵasynyń tómendeýi aiasynda birtindep tómendep keledi. Degenmen nazar aýdarýdy qajet etetin jekelegen faktorlar men táýekelder bar. Fiskaldyq yntalandyrý, ornyqty ishki suranys jáne joǵary infliatsiialyq kútýler – infliatsiianyń ishki faktorlaryna jatady. Retteletin baǵalardyń kóterilýinen bolǵan qaitalama áserlerden táýekel kúsheidi. Olar buryn teńge baǵamynyń dinamikasymen ótelgen bolatyn.
Aǵymdaǵy sheshim men táýekel balansyn eskersek, 2023 jyly bazalyq mólsherlemeni odan ári tómendetý múmkindikteri aitarlyqtai shektelip otyr. Jyl sońyna deiin jyldyq infliatsiia bir mándi deńgeige deiin baiaýlaǵan jaǵdaida ǵana aqsha-kredit saiasatyn jeńildetý sharalary qaralady" - delingen habarlamada.
Ulttyq bank málimetinshe, jyldyq infliatsiia biylǵy qyrkúiekte osy jylǵa arnalǵan boljamdy diapazonnyń 10-12% tómengi shegine aparatyn traektoriia boiynsha 11,8%-ǵa deiin tómendedi. Infliatsiianyń tómendeýi ustamdy qatań aqsha-kredit saiasaty men byltyrǵy joǵary baza áseriniń birtindep sarqylýy aiasynda jalǵasyp jatqan fiskaldyq yntalandyrý jaǵdaiynda oryn alyp otyr. Qyrkúiek aiyndaǵy kórsetkish turǵyn úi kommýnaldy sharýashylyq (budan ári – TKSh) tarifteriniń kútilgennen qalyptyraq ósýine bailanysty boljamnan tómen boldy. Ailyq infliatsiia 0,6% boldy. Bul ortasha tarihi mánderden áli de aitarlyqtai joǵary. Infliatsiialyq protsesterdiń ornyqtylyǵyn sipattaityn bazalyq infliatsiia turaqtanyp keledi.
"Infliatsiianyń baiaýlaýyna qaramastan, infliatsiialyq kútýler birshama jedeldedi. Bir jyldan keiin kútiletin infliatsiia qyrkúiekte 17% (tamyzda – 16,4%) boldy. Alaida, seziletin infliatsiia qyrkúiekte 17,8%-ǵa deiin (tamyzda – 18,4%) tómendedi. Jalpy alǵanda, kútiletin jáne seziletin infliatsiianyń dinamikasy TKSh naryǵyndaǵy reformalardyń iske asyrylýyn jáne JJM baǵasynyń ósýin kórsetedi.
Syrtqy infliatsiia baiaýlai otyryp, jaǵymdy qalyptasyp keledi. Biraq jekelegen proinfliatsiialyq faktorlar men táýekelder artty. Sút ónimderi, ósimdik maiy, et pen dándi daqyldar quny túskendikten, álemniń azyq-túlik naryǵynda baǵalar da tómendei bastady. Degenmen infliatsiialyq protsesterdiń ornyqtylyǵy damyǵan elderde mólsherlemelerdiń tómendeý merzimin jyljyta bastady jáne ortalyq bankter tarapynan tejeý saiasatynyń kúsheiýine ákeledi. Eýropa Ortalyq Banki 2023 jylǵy qyrkúiektegi sońǵy sheshiminde joǵary infliatsiiany álde de tómendetý úshin paiyzdyq mólsherlemeni taǵy kóterdi. AQSh Federaldy Rezervtik Júiesi de paiyzdyq mólsherlemeni kóterýi múmkin. OPEK+ elderi munaidy erikti túrde shekteýdi uzartqan edi. Osydan keiin munai baǵasy ósti. Sonyń aiasynda infliatsiia qarqyn alyp kete me degen alańdaýshylyq bar. Reseide 2023 jylǵy qyrkúiekte infliatsiianyń kúsh alýynan aqsha-kredit saiasatyn qatańdatý sharalary jalǵasyn tapty" - delingen habarlamada.
UB málimetinshe, aqsha-kredit talaptarynyń ustamdy qatań sipaty 2023 jyldyń qorytyndysy boiynsha boljamdy dálizdiń tómengi shekarasyna 10-12% jaqyn infliatsiiany odan ári tómendetýge, sondai-aq ony ortamerzimdi keleshekte 5%-dyq maqsatqa jaqyn turaqtandyrýǵa yqpal etetin bolady. Ulttyq Bank yqtimal aýytqýlarǵa ýaqytyly jaýap berý úshin jyldyq infliatsiianyń nysanaǵa kelý traektoriiasyn qadaǵalaidy.
