Ulttyq bank bazalyq mólsherlemeni jyldyq 9,00 protsentke deiin tómendetýge sheshim qabyldady. Protsenttik dáliz artyq/kemi 1,5 protsenttik tarmaqqa deiin qysqaryp otyr, dep habarlaidy "Ult aqparat" banktiń resmi saityna silteme jasap.
"Tiisinshe, ótimdilikti usyný boiynsha turaqty qol jetkizý operatsiialary boiynsha mólsherleme 10,5% jáne ótimdilikti alý boiynsha turaqty qol jetkizý operatsiialary boiynsha mólsherleme 7,5% bolady", – delingen resmi habarlamada.
Biyl mamyr-maýsym ailarynda ekonomikalyq belsendilik qatty qysqardy. Proinfliatsiialyq táýekelder de álsiredi. Alaida boljam basqasha bolǵan. Karantindi qatańdatý boiynsha qabyldanǵan qosymsha sharalar da dezinfliatsiialyq áser etedi. Sol sebepti bazalyq mólsherlemeni tómendetýge týra kelgen.
"Dollarlandyrýdyń ósý táýekelderi aitarlyqtai tómendedi, bul mólsherlemeni tómendetý úshin áleýetti keńeitti. Teńge aktivterin qorǵaý boiynsha jedel sharalar nátijesinde aǵymdaǵy jylǵy alty aidyń qorytyndysy boiynsha depozitterdi dollarlandyrý aldyn ala derekter boiynsha 43,1%-ten 40,0%-ke deiin tómendedi. Bul bazalyq mólsherlemeni tómendetý múmkindigine de yqpal etedi",– deidi bank mamandary.
Resmi aqparatqa sáikes, bazalyq mólsherlemeniń jańa deńgeii kreditterdiń qunyn tómendete otyryp, ósirilgen kredittik táýekelderdi belgili bir dárejede óteýge múmkindik beredi. Sonymen qatar, Qazaqstan ekonomikasyna karantindi kúsheitý jónindegi sharalar saldarynyń yqpalyn retteýge yqpal etip, Qazaqstan ekonomikasynyń ósýin qalpyna keltirý protsesin qoldaidy.
