Foto: Pixabay.com
Qazaqstan Ulttyq banki jyldyq bazalyq mólsherlemeni 15,25%-ǵa deiin kóterdi. Bul shara infliatsiiamen kúresý úshin qabyldandy. Qazan aiynda infliatsiia jyldyq esepteýde 8,5%-ǵa jetken bolatyn, dep habarlaidy Ult.kz.
Baǵanyń ósýine negizgi sebepter — retteletin qyzmetterdiń qymbattaýy, teńgeniń álsireýi jáne ishki suranystyń joǵary bolýy. Sondai-aq, álemdik infliatsiia, azyq-túlik baǵasynyń ósýi jáne valiýtalardyń aýytqýy da áser etýde.
Aldaǵy jyldarǵa jasalǵan boljamdarǵa sáikes, infliatsiia fiskaldyq yntalandyrý, kommýnaldyq qyzmetterdegi reformalar jáne syrtqy faktorlarǵa bailanysty maqsatty deńgeiden joǵary bolady. 2024 jyly infliatsiia 8-9% deńgeiinde, 2025 jyly 6,5-8,5%, al 2026 jyly 5,5-7,5% deńgeiinde kútilýde.
Qazaqstan ekonomikasy óse beredi, alaida munai baǵasynyń tómendeýi jáne syrtqy suranystyń álsizdigi ósý qarqynyn tejeidi. 2024 jylǵa arnalǵan JIÓ ósimi 4-4,5% deńgeiinde boljanýda. Ulttyq bank infliatsiiany turaqtandyryp, 2027 jylǵa qarai 5%-dyq maqsatqa jetý úshin aqsha-kredit saiasatyn qatańdatýdy jalǵastyrady.
«Tolyǵyraq málimetter 9 jeltoqsanda Aqsha-kredit saiasaty týraly esepte jariialanady. Bazalyq mólsherleme boiynsha kelesi sheshim 2025 jyldyń 17 qańtarynda jariialanady», — delingen Ulttyq bank habarlamasynda.
