Qyrkúiektiń basynan beri 22 el negizgi stavkany ósirgen. Bul týraly Úkimet otyrysynda eldiń aqsha-kredit saiasaty týraly málimet bergen QR Ulttyq bankiniń tóraǵasy Erbolat Dosaev aitty, dep habarlaidy QazAqparat.
Onyń aitýynsha, álem ekonomikasynyń jyldam qalpyna kelýi fiskaldyq yntalandyrýlar men jeńil aqsha-kredit talaptary esebinen múmkin bolyp otyr. Biraq sonyń saldarynan shikizat qymbattap jatyr.
«Biylǵy tamyzda Qytai men damyǵan elderdiń suranysy bazalyq metaldardyń baǵasyn 42,6%-ke qymbattatyp, sonyń áserinen ónerkásiptik shikizat quny 38,5%-ke ósti. Osy kezeńde aýyl sharýashylyǵy shikizaty 22,7%-ke qymbattady.
Al qyrkúiekte ósimdik maiy, dándi daqyldar, sút ónimderi men qant baǵasynyń kóterilýi nátijesinde FAO (BUU-nyń azyq-túlik jáne aýyl sharýashylyǵy uiymy-red.) tizbesindegi azyq-túlik baǵalarynyń indeksi 130,0-ǵa deiin ósti. Bir jyl ishinde FAO indeksi 32,8%-ke ósti», - dedi Erbolat Dosaev.
Onyń aitýyna qaraǵanda, álemde infliatsiialyq qysymnyń ósýi damyǵan elderdi de aqsha-kredit saiasatyn kúsheitýge májbúrlei bastaǵan.
«Osy jylǵy 22 qyrkúiektegi otyrysynda Federaldyq rezervter júiesi stavkany 2023 jyldyń ornyna 2022 jyldyń ózinde barynsha erte arttyrý máselesin talqylady. Eýropa ortalyq banki Eýroodaqta infliatsiianyń kiingi 13 jyldaǵy eń joǵary kórsetkishke deiin – 3,4%-ke, onyń ishinde Germaniiada 28 jyldaǵy eń joǵary kórsetkishke deiin – 4,1%-ke, Frantsiiada 10 jyldyq eń joǵary kórsetkishke deiin – 2,7%-ke jedeldetip, obligatsiialardy satyp alý kólemin qysqartýda.
Osy jylǵy qyrkúiektiń basynan bastap 22 el negizgi stavkany ósirdi. Onyń ishinde Reseide taǵy da infliatsiia biylǵy jylǵy qyrkúiekte 5 jyldaǵy eń joǵary kórsetkishke deiin 7,4%-ke ósip, mólsherleme 6,75%-ke deiin ulǵaidy. Jańa Zelandiia men Norvegiianyń ortalyq bankteri de negihgi mólsherlemeni 25 bazalyq tarmaqqa arttyrdy», - dedi Ulttyq bank tóraǵasy.
