Ýltramarafonshy, QR Qarýly Kúshteriniń áskeri qyzmetshisi Zańǵar Álkenov Qazaqstannyń Rekordtar kitabyna endi, dep habarlaidy "Ult aqparat".
Z.Álkenov 2020 jyldyń qyrkúiek aiynda 1,5 táýlik boiy toqtamastan júgirip, 200 shaqyrymdy quraityn «Qaraǵandy-Jańaarqa» baǵytyn 35 saǵat 12 minýtta eńsergen bolatyn.
«Qaraǵandy garnizony áskeri politsiia bóliminiń anyqtaý jáne izdestirý bólimshesiniń ofitseri kapitan Zańǵar Álkenov Qarýly Kúshterdiń áskeri qyzmetshileri arasynda alǵashqy bolyp Qazaqstannyń Rekordtar kitabyna kirip otyr», - dep málim etti QR Qorǵanys ministrliginiń baspasóz qyzmetinen.
Osy kúnderi áskeri qyzmetshi taǵy bir ýltramarafonǵa daiyndalýda. Bul jolǵy meje – 320 shaqyrym. Start 7 mamyrǵa josparlanǵan. Marafondy GPS-navigator arqyly onlain rejiminde baqylaýǵa bolady.
«Bári jaqsy deńgeide ótedi dep oilaimyn. Eger bul marafon men úshin tabysty bolsa, kelesi jyly Qaraǵandy - Almaty baǵyty boiynsha 1 000 shaqyrym júgirýdi josparlap otyrmyn», - deidi Zańǵar Álkenov.
Aita keteiik, Z.Álkenov qazaq kúresinen sport sheberi, dziýdodan sport sheberine úmitker. 2012 jyly jaraqat alǵannan keiin jekpe-jek ónerin uzaq qashyqtyqqa júgirýge almastyrdy.
